O‘zbekistondagi mavjud 143 ta istirohat bog‘ida joylashgan 1845 ta attraksionning atigi 5-6 foizi texnik ko‘rikdan o‘tkazilgan bo‘lib, foydalanish uchun xavfsiz degan xulosa berilgan. Qolgan attraksionlarning texnik holati nomaʼlum. Bu haqda “Daryo”ga Tog‘ kon geologiya va sanoat xavfsizligini nazorat qilish inspeksiyasining istirohat bog‘larini nazorat qilish bo‘limi boshlig‘i o‘rinbosari Abdufotih Rashidov maʼlum qildi.

Masʼulning maʼlumot berishicha, O‘zbekistondagi mavjud istirohat bog‘laridagi attraksionlarning to‘liq texnik ko‘rikdan o‘tkazilmasligiga bir nechta sabablar bor.

“Avvalo inspeksiyadagi qisqartirishlar sabab Tog‘ kon geologiya va sanoat xavfsizligini nazorat qilish inspeksiyasining ayni paytda Andijon, Namangan, Qashqadaryo, Sirdaryo, Jizzax va Toshkent viloyatlarida vakillari ham yo‘q. Qolaversa, inspeksiyaning to‘g‘ridan to‘g‘ri tadbirkor ishiga aralashib, uning aholiga xizmat ko‘rsatuvchi attraksionini texnik ko‘rikdan o‘tkazishga ruxsat yo‘q. Biz buning uchun maxsus ruxsatnoma olishmiz kerak.

Tadbirkorlarning oldiga borib, u foydalanayotgan attraksionni tekshiramiz desak, Ombudsmandan ruxsatnoma bormi, deb so‘rashadi. Yo‘q desak, tekshirishga haqqimiz yo‘qligini eslatishadi. Holbuki, kamchiliklari bor, aholining hayoti uchun xavfli bo‘lgan attraksionni ko‘rib tursak-da, uning faoliyatini to‘xtata olmaymiz. Qo‘l-oyog‘imiz bog‘liq. Shunga qaramasdan, biz harakatdan to‘xtaganimiz yo‘q. Imkoniyatimiz yetganicha, mavjud attraksionlarning 5-6 foizini texnik ko‘rikdan o‘tkazdik”, — deydi Abdufotih Rashidov.

Avvalroq Buxoro viloyatida er-xotin farzandi bilan attraksiondan tushib ketgani, Farg‘onada esa 17 yoshli qiz qo‘lbola usulda yasalgan attraksiondan yiqilib tushgani, mazkur attraksionlar masʼul tashkilot tomonidan foydalanishga yaroqsiz, xavfli deb topilgani maʼlum bo‘lgandi.