“Qo‘lbola usulda yasalib, o‘zboshimchalik bilan o‘rnatilgan”. Farg‘onada 17 yoshli qiz yiqilgan attraksion haqida ma’lumot berildi
Farg‘ona viloyati Rishton tumanida joylashgan markaziy istirohat bog‘idagi attraksiondan 17 yoshli qiz tushib ketgani to‘g‘risida xabar berilgandi. Tog‘-kon, geologiya va sanoat xavfsizligini nazorat qilish inspeksiyasi ushbu holatga munosabat bildirdi.
Qayd etilishicha, Rishton tumani “Ar-Roshidoniy” madaniyat va istirohat bog‘ida joylashgan, tadbirkor I.T ga qarashli “Qaroqchilar kemasi” attraksioniga chiqqan 2005-yilda tug‘ilgan fuqaro N.O. attraksionning mahkamlangan himoya zanjirini o‘z qo‘li bilan bo‘shatib yuborishi sababli yerga qulab tushgan (kamera tasviridan olingan ma’lumotga ko‘ra).
Qiz og‘ir ahvolda tuman shifoxonasining reanimatsiya bo‘limiga yotqizilgan. Inspeksiya xodimlari tomonidan holat yuzasidan o‘tkazilgan o‘rganish natijasida “Qaroqchilar kemasi” attraksioni qo‘lbola usulda yasalgan bo‘lib, 2022-yil iyulda tadbirkor I.T tomonidan o‘zboshimchalik bilan o‘rnatilgani aniqlangan.
Mavjud talablarga ko‘ra, attraksion maxsus ixtisoslashtirilgan tashkilot tomonidan o‘rnatilishi lozim. Shuningdek, attraksionning texnik pasporti mavjud emas, statik va dinamik sinovlardan o‘tkazilmagan, kunlik texnik nazorat, attraksion elektr jihozlarini yerga zaminlash va izolyatsiyasi qarshiligini o‘lchash, ishga tushirish va sozlash ishlari bajarilmagan. Attraksionga 2022-yil avgust oyida mavsum uchun maxsus laboratoriya tomonidan metall konstruksiyasining mustahkamligi to‘g‘risida ijobiy xulosa berilgan bo‘lsada, shu kungacha attraksiondan tegishli ruxsatnoma olinmasdan foydalanilgan.
Hozirgi vaqtda fuqaro N.O.ning ahvoli qoniqarli ekani ma‘lum qilingan. Ushbu holat bo‘yicha huquq-tartibot organlari tekshiruv o‘tkazmoqda.
Avvalroq Buxoro shahrida joylashgan istirohat bog‘ida er-xotin va ularning farzandi attraksiondan yiqilgani to‘g‘risida xabar berilgandi. “Kontexnazorat”ning ma’lum qilishicha, ushbu attraksiondan foydalanish taqiqlangan bo‘lgan.
