Ўзбекистондаги мавжуд 143 та истироҳат боғида жойлашган 1845 та аттракционнинг атиги 5-6 фоизи техник кўрикдан ўтказилган бўлиб, фойдаланиш учун хавфсиз деган хулоса берилган. Қолган аттракционларнинг техник ҳолати номаълум. Бу ҳақда “Дарё”га Тоғ кон геология ва саноат хавфсизлигини назорат қилиш инспекциясининг истироҳат боғларини назорат қилиш бўлими бошлиғи ўринбосари Абдуфотиҳ Рашидов маълум қилди.
Масъулнинг маълумот беришича, Ўзбекистондаги мавжуд истироҳат боғларидаги аттракционларнинг тўлиқ техник кўрикдан ўтказилмаслигига бир нечта сабаблар бор.
“Аввало инспекциядаги қисқартиришлар сабаб Тоғ кон геология ва саноат хавфсизлигини назорат қилиш инспекциясининг айни пайтда Андижон, Наманган, Қашқадарё, Сирдарё, Жиззах ва Тошкент вилоятларида вакиллари ҳам йўқ. Қолаверса, инспекциянинг тўғридан тўғри тадбиркор ишига аралашиб, унинг аҳолига хизмат кўрсатувчи аттракционини техник кўрикдан ўтказишга рухсат йўқ. Биз бунинг учун махсус рухсатнома олишмиз керак.
Тадбиркорларнинг олдига бориб, у фойдаланаётган аттракционни текширамиз десак, Омбудсмандан рухсатнома борми, деб сўрашади. Йўқ десак, текширишга ҳаққимиз йўқлигини эслатишади. Ҳолбуки, камчиликлари бор, аҳолининг ҳаёти учун хавфли бўлган аттракционни кўриб турсак-да, унинг фаолиятини тўхтата олмаймиз. Қўл-оёғимиз боғлиқ. Шунга қарамасдан, биз ҳаракатдан тўхтаганимиз йўқ. Имкониятимиз етганича, мавжуд аттракционларнинг 5-6 фоизини техник кўрикдан ўтказдик”, — дейди Абдуфотиҳ Рашидов.
Аввалроқ Бухоро вилоятида эр-хотин фарзанди билан аттракциондан тушиб кетгани, Фарғонада эса 17 ёшли қиз қўлбола усулда ясалган аттракциондан йиқилиб тушгани, мазкур аттракционлар масъул ташкилот томонидан фойдаланишга яроқсиз, хавфли деб топилгани маълум бўлганди.
Изоҳ (0)