Rossiya mudofaa vaziri Shoygu okkupatsiya qilingan Mariupolga borgani xabar qilindi (video)
Rossiya Mudofaa vazirligining rasmiy sahifasida vazirlik rahbari Sergey Shoyguning Mariupolga safari paytida olingani aytilgan video e’lon qilindi. Vazirlik qayd etishicha, tashrif “maxsus harbiy operatsiya zonasiga ish safari” doirasida amalga oshirilgan.
Videoda Shoygu vertolyot bortida, aholi punkti ko‘chasida va tibbiyot punkti binosida ko‘ringan. Unga Favqulodda vaziyatlar vazirligi kiyimidagi va kamuflyaj kiygan, qurollangan odamlar hamrohlik qilgan. OAV video qachon va aynan qayerda tasvirga olinganini hali aniqlay olmadi.
Vazirlik maʼlumotlariga ko‘ra, Mariupolda Shoygu “Donbass infratuzilmasini tiklash” bo‘yicha Rossiya Mudofaa vazirligining harbiy qurilish kompleksini ishini tekshirgan. Boshqa narsalar qatorida, vazir ko‘p funksiyali tibbiyot markazi, o‘zini o‘zi respublika deb e’lon qilgan Donetsk xalq respublikasi Favqulodda vaziyatlar vazirligining qutqaruv markazi va yangi mikrorayonda bo‘ldi, deyiladi press-relizda,
“Shuningdek, Sergey Shoygu Rostov viloyati va DXRni bog‘lovchi eng yirik suv quvuri qurilishi haqidagi hisobotni tingladi. Don daryosidan Severskiy Donets-Donbass kanaligacha bo‘lgan suv o‘tkazgich mintaqadagi ko‘plab aholi punktlarini suv bilan ta’minlaydi”, — qo‘shimcha qilingan vazirlik xabarida.
4-mart kuni Rossiya Mudofaa vazirligi Shoygu “maxsus operatsiya” zonasiga, jumladan, “Vostok” qo‘shinlari guruhining Janubiy Donetsk yo‘nalishidagi tuzilmalaridan birining frontga yaqin nazorat postiga tashrif buyurganini ma’lum qildi. Bundan oldin vazirlik yanvar oyida Shoyguning urush zonasida tekshiruv o‘tkazgani haqida xabar bergan edi.
2022-yil dekabr oyida vazirlik o‘z rahbarining urush hududiga qilingan yana ikki safari haqida gapirdi. Xususan, 18-dekabr kuni Rossiya Mudofaa vazirligi matbuot-reliziga ko‘ra, Shoygu rossiyalik harbiylarning “oldingi pozitsiyalarini” tekshirgan. Faollar e’lon qilingan videoni tahlil qilib, Shoygu frontdan 80 kilometr uzoqda degan xulosaga kelishdi.
Rossiya qo‘shinlari Ukrainaga bosqinning boshidanoq Mariupolni egallashga harakat qildi. “Azovstal” zavodida mudofaani ushlab turgan Mariupolning so‘nggi ukrainalik himoyachilari taslim bo‘lgandan so‘ng, may oyi o‘rtalarida rossiyaliklar shaharni nazorat qilishga muvaffaq bo‘ldi. Sentabr oyi oxirida Rossiya shaharni DXR tarkibiga qo‘shib oldi.
