AQSH Ukraina uchun 275 mln dollarlik yangi yordam paketi haqida e’lon qildi

AQSH Ukrainaga 275 million dollarlik yangi harbiy yordam paketini taqdim etadi, unga HIMARS baravar o‘t ochish reaktiv tizimi uchun o‘q-dorilar va 155 millimetrli artilleriya snaryadlari kiradi. Bu haqda Pentagon saytida xabar berildi.

Bundan tashqari, paket uchuvchisiz uchar qurilmalarga qarshi kurashish uchun vositalarni va boshqa havo hujumiga qarshi mudofaa vositalarini; HMMWV ko‘p maqsadli furgonlarini, tez yordam mashinalari va tibbiy uskunalarni; generatorlarni; dala qurilmalarini o‘z ichiga oladi.

Idora qayd etishicha, bu o‘tgan yil avgustidan buyon Pentagon zaxiralaridan Ukraina uchun 27-marta qurol-yarog‘ olinishidir. Maxsus operatsiya boshidan buyon Ukrainaga ajratilgan yordam summasi 19,3 milliard dollardan, 2014-yildan buyon esa 22,1 milliard dollardan oshdi, deyiladi vazirlik xabarida.

Bundan avvalgi harbiy yordam paketini AQSH 23-noyabr kuni ajratgan, u 125 million dollardan ziyod edi. Unga HIMARS snaryadlari va 155 millimetrlik snaryadlardan tashqari, NASAMS zenit-raketa majmualari uchun o‘q-dorilar, yirik kalibrli pulemyotlar, HARM radiolokatsiyaga qarshi raketalar va boshqa qurollar kirgandi.

So‘nggi vaqtlarda Ukraina boshqa G‘arb mamlakatlaridan ham qurol-yarog‘ olmoqda. Masalan, noyabr oxirida Buyuk Britaniya unga yuqori aniqlikdagi Brimstone-2 raketalarini bergandi. 8-dekabr kuni Germaniya Ukrainaga 20 ta Dingo bronetransportyorlari va ikkita M1070 Oshkosh katta yukli yarim pritseplarini yuborganini ma’lum qildi.

Rossiya G‘arb tomonidan Ukrainaga qurol yetkazib berilishi, birinchidan, Moskvaga maxsus operatsiya maqsadlariga erishishda xalal bermasligini, ikkinchidan esa, ukrainaliklarga faqat “azob” keltirishini bir necha marta ta’kidlagan.