Angrenda sobiq hokim yordamchisi o‘zini otib o‘ldirdi
Toshkent viloyati Angren shahrida 2-dekabr kuni hokim yordamchisi o‘z uyidan jonsiz holda topildi. Bu haqda Bosh prokuratura matbuot kotibi Hayot Shamsutdinov “Daryo”ga ma’lum qildi.
Qayd etilishicha, soat 15:00 da shaharning Dukent qo‘rg‘oni “Ulug‘bek” mahallasida yashovchi, 1983-yilda tug‘ilgan B.N. xonadonida jonsiz holda topilgan. “Ovchilik” birlashmasining qonuniy a’zosi bo‘lgan, 4 nafar farzandning otasi B.N. o‘ziga tegishli ov quroli bilan tanasining chap ko‘krak sohasi qismiga taqab bir marta o‘q uzib, o‘z joniga qasd qilgan va voqea joyida halok bo‘lgan. U sochma qo‘rg‘oshinli o‘qdan foydalangani aniqlangan.
Holat yuzasidan olib borilgan surishtiruv ishlari davomida fuqaro B.N. Angren shahri “Dorilfunun” MFYda hokim yordamchisi lavozimida ishlagani va yaqinda ishdan bo‘shagani aniqlangan. Shuningdek, u otasining vafotiga ko‘p bo‘lmagani sababli tushkun kayfiyatda yurgani aytilgan. Hozirda holat yuzasidan qo‘shimcha surishtiruv ishlari olib borilmoqda.
Mavzuga doir:
- Toshkent viloyatida 14 yoshli o‘smir tog‘asining o‘g‘lini otib o‘ldirib qo‘ydi
- Toshkentda 12 yoshli qiz o‘zini osib o‘ldirgani bo‘yicha qo‘shimcha ma’lumot berildi
