AQSH, Yaponiya va Janubiy Koreya Shimoliy Koreyaga qarshi yangi sanksiyalar kiritdi

AQSH, Janubiy Koreya va Yaponiya Shimoliy Koreyaning bir qator amaldorlariga nisbatan sanksiyalar joriy qildi. AQSH moliya vazirligi saytida e’lon qilingan xabarda aytilishicha, bu amaldorlar KXDRning qurol-yarog‘ ishlab chiqarish dasturlariga aloqador.

AQSH Moliya vazirligi bayonotida ushbu shaxslarning ismlari ham ko‘rsatilgan: Jon Il Xo, Yu Jin va Kim Su Gil. Ular aprel oyida Yevropa Ittifoqi sanksiyalariga uchragandi. Mazkur amaldorlar Shimoliy Koreya harbiy sanoat departamenti direktori o‘rinbosari va direktori lavozimlarida ishlagani hamda ommaviy qirg‘in qurollarini yaratishda muhim rol o‘ynagani aytilmoqda.

Janubiy Koreya Tashqi ishlar vazirligi yana yetti nafar shaxs, jumladan, bir nafar singapurlik va bir nafar tayvanlik fuqarolarga, shuningdek, sakkizta yuridik shaxsga nisbatan sanksiyalar joriy etilganini e’lon qildi. Ularning barchasi 2018-yil yanvaridan 2022-yilning oktabrigacha joriy qilingan AQSH sanksiyalari ro‘yxatida bor.

O‘z navbatida, Yaponiya uch tashkilot va bir shaxsga, jumladan, kiberhujumlarni amalga oshirishda gumon qilinayotgan Lazarus guruhiga nisbatan ham yangi sanksiyalar joriy qilgan.

So‘nggi sanksiyalar Shimoliy Koreyaning 18-noyabrda o‘tkazgan xalqaro ballistik raketalar sinovi fonida joriy qilinmoqda. KXDR yil boshidan beri 60 dan ortiq raketa sinovlarini o‘tkazdi, bu esa uning 2017-yildan buyon to‘xtatib qo‘yilgan yadroviy qurol sinovlarini qayta boshlashi mumkinligidan xavotir uyg‘otmoqda.