Bir guruh amerikalik senatorlar AQSH Davlat departamentidan “Vagner” xususiy harbiy kompaniyasini xorijiy terrorchi tashkilot sifatida belgilashni talab qiluvchi qonun loyihasini taqdim etdi. Senatorlar Rojer Uiker va Ben Kardin e’lon qilgan xabarda aytilishicha, bu tashabbus Vakillar palatasida ham ko‘rib chiqiladi.

“Amerikalik senatorlar Missisipi shtatidan respublikachi Rojer Uiker va Merilend shtatidan demokrat Ben Kardin bugun (1-dekabr) ‘Rossiya yollanma jangchilari uchun javobgarlik to‘g‘risida’gi qonun — Davlat departamenti Rossiyada joylashgan ‘Vagner’ xususiy harbiy kompanyasini xorijiy terrorchi tashkilot sifatida belgilashini talab qiladigan ikki partiyaviy qonunni taqdim etdi”, — deyiladi xabarda.

Unda qayd etilishicha, demokratlar Stiven Koen va Mark Vizi hamda respublikachilar Jo Uilson va Richard Xadson Vakillar palatasiga taklifni qo‘llab-quvvatlash tashabbusi bilan chiqadi.

Kardin “Vagner” guruhi “Ukraina, Suriya va butun Afrika qit’asidagi son-sanoqsiz vahshiyliklarga, shubhasiz, aloqador” ekanini ta’kidladi.

Senatorlar tomonidan taklif etilgan qonun loyihasida “Vagner’ yoki uning izdoshlariga aloqador har qanday tuzilmalarni” xorijiy terrorchi tashkilotlar deb e’lon qilish ham taklif qilingan. Tashkilotga terroristik tuzilma maqomini berish AQSHga guruh a’zolarini jinoiy javobgarlikka tortish va butun dunyo bo‘ylab ularning xalqaro aktivlarini kuzatish huquqini beradi.

“Vagner” o‘zi qanday guruh?

“Vagner” guruhi birinchi marta Ukrainada 2014-yilda paydo bo‘lgan va Rossiyaning Qrimni egallab olishida muhim rol o‘ynagan edi. Unga maxsus topshiriqli bo‘linma sobiq jangchisi Dmitriy Valeryevich Utkin asos solgan deb hisoblanadi, u guruhga Gitlerning sevimli kompozitori Richard Vagnerning nomini bergan.

Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.