Xitoy bortida 3 nafar kosmonavt bo‘lgan kemani orbitaga chiqardi (video)

Xitoyning “Shenchjou-15” boshqariladigan kosmik kemasi bortida uch nafar kosmonavt bilan fazodagi Tyangun Milliy orbital stansiyasiga uchirildi, deb xabar bermoqda CGTN.

Kosmik kema Xitoy shimoli-g‘arbidagi Gansu provinsiyasidagi Szyutsyuan kosmodromidan 29-noyabr kuni Pekin vaqti bilan 23:08 da uchirilgan. Uchirishdan taxminan o‘n daqiqa o‘tgach, “Shenchjou-15” kemasi “Chanchjdn-2F” raketa tashuvchisidan ajralgan va mo‘ljallangan orbitaga chiqqan. Boshqariladigan kemalar bo‘yicha Xitoy kosmik agentligi (CMSA) ekipaj a’zolari yaxshi holatda ekani va uchirish muvaffaqiyatli o‘tganini aytdi.

“Shenchjou-15” ekipaji tarkibi uch nafar kosmonavtdan iborat: 57 yoshli Fey Szyunlun — komandir, 56 yoshli Deng Sinmin va 46 yoshli Chjan Lu. Bu Fey Szyunlunning koinotga ikkinchi parvozi: 2005-yilda u “Shenchjou-6” boshqariladigan kosmik kemaning komandiri bo‘lgan va deyarli 5 kun orbitada bo‘lib qaytgan, ekipajning qolgan a’zolari birinchi marta koinotga uchmoqda.

Kosmonavtlar Tyangunga yetib borgach, shu yilning iyun oyidan buyon u yerda ishlayotgan “Shenchjou-14” missiyasi ekipaji ortga qaytadi. Shunday qilib, Xitoy orbital stansiyasi tarixida ekipajning birinchi rotatsiyasi amalga oshiriladi. Yangi kelgan kosmonavtlar stansiyada kelasi yilning may oyigacha qoladi.

Xabar qilinishicha, bu missiya to‘rtinchi Tyangun ekspeditsiyasi bo‘ladi. Ekipaj 40 dan ortiq ilmiy-texnik tajriba va sinovlarni o‘tkazishi, shuningdek, stansiyadan tashqarida montaj ishlarini bajarish uchun uch-to‘rt marta ochiq fazoga chiqishi kerak bo‘ladi.