Foto: Boris Jonson Xersonga yuboriladigan gumanitar yordamni mashinaga shaxsan yukladi

Buyuk Britaniyaning sobiq bosh vaziri Boris Jonson Ukraina kasalxonalariga jo‘natiladigan dori-darmon va jihozlar uchun Rojdestvo yig‘imi boshlanganini e’lon qildi. Shuningdek, u Rossiya bosqinidan ozod qilingan Xersonga gumanitar yordamni mashinalarga yuklash va tashishda shaxsan ishtirok etdi. Bu haqda Boris Jonsonning Twitter’dagi sahifasida ma’lum qilindi.

Jonsonning so‘zlariga ko‘ra, u Circle Health Group — Buyuk Britaniyadagi eng yirik xususiy shifoxonalar tarmog‘i tashabbusida ishtirok etgan. Tarmoq Xersondagi kasalxonalar uchun 12 ta yuk mashinasida tibbiy asbob-uskunalar to‘plagan. Jonsonning o‘zi esa 13-mashinaga zamonaviy tibbiy karavot va narkoz apparatlarini ortishga yordam bergan.

Avvalroq Boris Jonsonga Kiyevning faxriy fuqarosi unvoni berilgan edi. Kiyev meri Vitaliy Klichko Jonsonning tinchlik davrida ham, urushning “eng keskin davrida” ham shaharga bir necha bor kelganini va ko‘plab yordamini qayd etgan.