Bugun,

  • USD 11095.31
  • RUB 173.84
  • EUR 10772.44

Kreml 25-noyabr kuni Rossiya prezidenti Vladimir Putin Ukrainadagi maxsus operatsiyada qatnashgan “harbiy xizmatchilarning onalari bilan uchrashgani” haqida xabar berdi.

Foto: “TASS”

Foto: “TASS”

O‘z nutqining avvalida Putin ularning baholari, fikrlari, g‘oyalari, takliflarini eshitish uchun “harbiy xizmatchilarning onalari bilan suhbatlashishga qaror qilgani”ni aytdi. Ular aytgan narsalarning barchasi hisobga olinib, hayotga tatbiq etilishiga erishishga harakat qilishini ta’kidladi.

Prezident matbuot xizmati tarqatgan videotasvirlarda uchrashuvga 18 nafar ayol kelganini ko‘rish mumkin. “Mojem obyasnit” nashri da’vo qilishicha, uchrashuvning ba’zi a’zolari kimligini aniqlagan. Ular orasida moskvalik mansabdor, “Yagona Rossiya” partiyasi deputati Olga Belseva, “Umumrossiya xalq fronti”ning Podmoskovyedagi ijroiya qo‘mitasi rahbari Yuliya Belexova va Orexovo-Zuyevo Jamoatchilik palatasi a’zosi Marina Migunova bo‘lgan. Nashr ma’lumotlariga ko‘ra, Putinga eng yaqin o‘tirgan ayol rejissor Olesya Shigina bo‘lib, u vatanparvarlik ruhidagi kinolar ishlaydi.

Uchrashuvda qatnashganlarning barchasining farzandlari Ukraina jang qilayotgani aniq emas. Dog‘istonlik Suna Nabiyeva Putin bilan uchrashuvda uning o‘g‘li Enver Qozon oliy tank bilim yurtini tugatib, Buryatiyada xizmat qilganini va Ukrainadagi urushning ilk kunlaridanoq jangovar harakatlarda qatnashayotganini aytdi. Yana bir ayol 2014-yilda “ko‘ngillilar qo‘shiniga borib qo‘shilgan” o‘g‘li Konstantin Pshenichkin halok bo‘lgani haqida gapirib berdi.

Vladimir Putin urush qatnashchilarining onalari bilan uchrashuv o‘tkazishi haqida bir necha kun avval, 22-noyabr kuni ma’lum bo‘ldi. Safarbar etilganlar va muddatli harbiy xizmatchilarning qarindoshlarini birlashtiruvchi “Onalar va rafiqalar kengashi” jamoatchilik harakati ishtirokchilari ulardan hech kim uchrashuvga taklif etilmagani uchun prezident ma’muriyatini tanqid qildi. Kengash tashkilotchisi Olga Sukanova tadbirga Kreml “izmidagi onalar” kelishini taxmin qilgandi.

Eslatib o‘tamiz, uchrashuv Putinning Novo-Ogaryovodagi qarorgohida bo‘lib o‘tgan. Kreml matbuot kotibi Dmitriy Peskov prezident va harbiy xizmatchilarning onalari o‘rtasida erkin suhbat o‘tkazilishini aytgan.

“Shuni bilishingizni istardimki, shaxsan men va butun mamlakat rahbariyati sizning dardingizga sherikmiz. Farzandidan ayrilishni hech qaysi ota-ona ko‘tara olmaydi. Rossiya hukumati halok bo‘lgan askarlarning onalari o‘zlarini unutilganday his qilmasliklari uchun qo‘lidan kelgan hamma narsani qiladi. Hech narsa yo‘qotilgan o‘g‘ilning o‘rnini bosolmaydi”, — dedi Putin.

Shuningdek, Rossiya rahbari urush maydonidagi harbiylarga shaxsan o‘zi qo‘ng‘iroq qilgani va ularning muammolari bilan qiziqqanini ta’kidlab, ularni qahramonlar deb atagan.

 

Mavzuga doirPutin urushga safarbar qilinganlarning oilasi bilan uchrashadi

 

Izoh
Asosiy yangiliklar
Dunyo
General Pyotr Pavel Chexiyaning yangi prezidenti etib saylandi
Dunyo
Amerikadagi rus mafiyasi boshlig‘iga aylanib, Rossiyada o‘lim topgan “qonundagi o‘g‘ri” — “Yaponchik”. Kun xronologiyasida 29-yanvar
Mahalliy
Markaziy bank raisining kripto-aktivlar bo‘yicha ma’lumoti rad etildi