Gavi Ispaniya terma jamoasi safida yana ikkita rekord qayd etdi

Ispaniya terma jamoasi yarim himoyachisi Gavi Kosta-Rikaga qarshi bahsda (7:0) Jahon Chempionatidagi debyutini o‘tkazdi va gol urishga erishdi.

18 yosh-u 110 kunlik Gavi yirik musobaqalarda (JCH/Yevro) o‘ynagan Ispaniya tarixidagi eng yosh futbolchiga aylandi.

Futbolchi 74-daqiqada Kosta-Rika darvozasini ishg‘ol qildi. Shu tariqa Gavi mundialda gol urgan eng yosh ispaniyalik va yevropalik futbolchi bo‘ldi.

Jahon Chempionatlari tarixida faqat ikki futbolchi Gavidan yoshroq paytida gol urgan. Rekord 1958-yil Braziliya safida gol urgan Pelega (17 yosh-u 239 kun) tegishli. Undan keyingi o‘rinda 1930-yilda to‘p kiritgan Meksika sobiq futbolchisi Manuel Rosas (18 yosh-u 93 kun) joy olgan.

Qayd etish kerak, Gavi Ispaniya terma jamoasi tarixida eng yosh o‘yinchi va eng yosh gol muallifi hisoblanadi.

Mavzuga doir: Ispaniya terma jamoasi Jahon Chempionatlaridagi eng yirik hisobini qayd etdi