Krishtianu Ronaldu FA tomonidan 2 ta o‘yinga chetlatildi va jarimaga tortildi

Hujumchi Krishtianu Ronaldu autizm bilan xastalangan bolaga nisbatan agressiv harakat qilgani uchun jazoga tortildi.

Portugaliyalik futbolchi APL 2021/22-yilgi mavsum 32-turi doirasida “Everton” va “Manchester Yunayted” jamoalari o‘rtasidagi uchrashuvdan (1:0) keyin tribuna ostiga yo‘l olayotgan vaqtda muxlislardan birining qo‘liga zarba berib, smartfonini tushirib yuborgandi.

Keyinchalik bolakay autizmga chalingani ma’lum bo‘lgan va uning onasi sudga murojaat qilgandi.

Mazkur vaziyatni o‘rganib qaror chiqargan Angliya futbol assotsatsiyasi (FA) 37 yoshli futbolchining bu ishini “kerak bo‘lmagan va tajovuzkorona” harakat deb topgan. Shu bois Ronaldu ikkita o‘yinga chetlatilgan, 50 ming funt miqdorida jarimaga tortilgan va ogohlantirish olgan.

Eslatib o‘tamiz, 22-noyabr kuni “Manchester Yunayted” Ronaldu bilan amaldagi shartnomani bekor qilgandi. Bunga futbolchining shov-shuvli intervyusi sabab bo‘lgan.

Mavzuga doir:

• Krishtianu Ronaldu: “Portugaliya chempion bo‘ladi, biroq sen gol urmaysan deyishsa, bunga rozi bo‘lardim”
• Krishtianu Ronaldu Instagram’da 500 mln obunachiga ega bo‘lgan ilk shaxsga aylandi