Boks bo‘yicha JCH—2023 Toshkent mezbonligida o‘tishi tasdiqlandi. Unda rekord darajadagi mukofot jamg‘armasi o‘ynaladi
O‘zbekistonning Toshkent shahri boks bo‘yicha kattalar o‘rtasidagi 2023-yilgi Jahon chempionatiga mezbonlik qilishi haqida ma’lum qilingandi.
Iordaniyaning Amman shahrida 7-noyabr kuni Xalqaro boks assotsiatsiyasi (IBA) prezidenti Umar Kremlyov ishtirokida o‘tgan matbuot anjumanida bu masala rasman tasdiqlandi va musobaqa borasida bir nechta ma’lumotlar berildi.
Toshkent 2023-yilning 1—14-may kunlari Jahon chempionatiga mezbonlik qiladi.
Qayd etilishicha, O‘zbekiston mezbonligidagi musobaqada rekord darajadagi mukofot pullari beriladi. Jahon chempionatining mukofot jamg‘armasi 5,2 million dollarni tashkil etadi. Oltin medal egalari 200 ming, ikkinchi o‘rinlar 100 ming va bronza medal egalari 50 ming dollarga sazovor bo‘ladi.
Ma’lumot uchun, boks bo‘yicha Jahon chempionati 1974-yildan beri o‘tkazib kelinadi. 1986-yilga qadar har to‘rt yilda bir bo‘lgan musobaqa 1989-yildan boshlab har ikki yilda o‘tkaziladi. Toshkent ilk bor mazkur turnirga mezbonlik qiladi.
O‘zbekiston poytaxti 1995, 1997 va 2017-yillarda Osiyo chempionatiga mezbonlik qilgan.
