Buxoroda davlat-sherikchilik asosida ajratilgan yer maydonini 105 ming dollarga sotmoqchi bo‘lgan shaxs ushlandi
Buxoro viloyatining Buxoro tumani hamda Qashqadaryo viloyatining Qarshi shahrida yer maydonlari savdosi bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Buxoro viloyat boshqarmasi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro O.A. (muqaddam sudlangan) fuqaro Ch.B.ning ishonchiga kirib, Buxoro tuman “Bog‘idasht” MFY hududidan uning singlisi nomiga savdo va maishiy xizmat ko‘rsatish binosi qurish uchun davlat-xususiy sherikchilik shartlari asosida ajratilgan 7 sotix yer maydonini 105 000 dollarga sotishga kelishgani aniqlangan. U oldindan 30 000 dollari va 200 million so‘mni olgan vaqtida ashyoviy dalillar bilan ushlangan.
Shuningdek, departamentning Qarshi shahar bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro A.J. fuqaro M.A.ga tanishlari orqali Ko‘kdala tumani “Annaruz” MFY hududida joylashgan 60 sotix zaxiradagi yer maydonini uning nomiga rasmiylashtirib berishini aytgani aniqlangan. U evaziga 150 million so‘mni olgan vaqtida ashyoviy dalillar bilan qo‘lga olingan.
A.J.ning ko‘rsatuviga asosan davom etgan tadbirda boshqa bir fuqaro M.B. fuqaro A.J.dan 60 sotix zaxiradagi yer maydonini M.A.ning nomiga rasmiylashtirib berishi evaziga 130 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
