O‘zbekiston chakana savdo bozorida diskaunterlarning o‘sishi kutilmoqda
O‘zbekiston chakana savdo bozorida yaqin yillarda diskaunterlar o‘sishi kutilmoqda. Bu haqda Infoline kompaniyasi bosh direktori Ivan Fedyakovga tayanib, EastFruit xabar bermoqda.
Diskaunter — tovar yoki xizmatlarni odatdagidan pastroq narxda sotadigan yirik biznes.
Uning so‘zlariga ko‘ra, postsovet hududi mamlakatlari bozorlari rivojlanishini taqqoslab, O‘zbekistonda chakana savdo bozori rivojining asosiy trendlarini aniqlash va ayrim yo‘nalishlarni prognoz qilish mumkin.
Birinchidan, mamlakatda chakana savdo bozorining rivojlanishi uchun demografik vaziyat anchayin qulay — O‘zbekistonda tug‘ilish koeffitsiyenti ikkidan yuqori va aholi soni o‘sishi yaxshi sur’atlarda davom etmoqda.
Ikkinchidan, boshqa mamlakatlardan farqli o‘laroq, O‘zbekistonda inflyatsiyaning keskin o‘sishi kuzatilmayapti va aholi jon boshiga o‘rtacha daromadlar o‘sib bormoqda.
Infoline prognozlariga ko‘ra, aholi daromadlari kelgusi yillarda o‘sishda davom etadi.
O‘zbekiston Davlat statistika qo‘mitasi ma’lumotlariga ko‘ra, 2022-yilning yanvar—mart oylarida mamlakat aholisining umumiy daromadlari 114,2 trillion so‘mni tashkil etib, nominal ko‘rsatkichlarda o‘sish 15,9 foizni, real ko‘rsatkichlarda 5,4 foizni tashkil etdi.
O‘zbekistonda chakana savdo aylanmasi 2021-yil yakunlariga ko‘ra 24,1 milliard dollarni tashkil etgan edi. Toshkent shahrida chakana savdo obyektlari miqdori: har 1000 kishiga ikkitadan kam oziq-ovqat do‘koni to‘g‘ri keladi.
2021-yilda aholi jon boshiga chakana savdo aylanmasi oyiga 58 dollarni tashkil etgan. Chakana savdo obyektlari soni (1000 kishiga) va aholi jon boshiga to‘g‘ri keladigan chakana savdo aylanmasi bo‘yicha Toshkent solishtirma shaharlardan ortda qolmoqda.
Bu esa mamlakatning chakana savdo bozorlari uchun yuqori o‘sish salohiyatiga ega ekanligini ko‘rsatadi.
O‘zbekistonda kuzatiladigan rivojlanish strategiyalari Rossiyadagiga o‘xshash. Yaqin yillarda O‘zbekiston bozorida diskaunterlar, jumladan, “qattiq” diskaunterlar ortadi. Bular Rossiyaning “Dobrotsen”, “Chijik”, “Moya sena” kabi loyihalari bo‘lishi ham mumkin.
Rivojlanishning ikkinchi strategiyasi — e-com-loyihalarni ishga tushirish, internet tijoratni rivojlantirishdir.
O‘zbekistonda onlayn savdo bozori hajmi bor-yo‘g‘i 0,8 milliard dollarni tashkil etadi va bu o‘sish uchun ulkan salohiyat mavjudligini anglatadi.
O‘zbekiston chakana bozorini kutayotgan yana bir trend — omnikanallikning rivojlanishi.
O‘zbekiston bozori o‘sib borishiga va unga yangi istiqbolli formatlar kirishiga ishonchimiz komil, — deya xulosa qildi Ivan Fedyakov.
