Rossiyaning Krasnodar o‘lkasi, Yeysk shahrida bombardimonchi samolyotning halokatga uchrashi holatlarini o‘rganish chog‘ida uning dvigateliga ikkita chayka kirib qolgani aniqlandi. Bu esa samolyot halokatiga sabab bo‘lgan, deb ma’lum qildi “TASS” agentligining manbalari.
“Ularning (chayka) qoldiqlari ekspertlar tomonidan samolyot bo‘laklarini tekshirish chog‘ida topildi”, — dedi manba va samolyot havoga ko‘tarilayotganda qushlar dvigateliga kirib qolganini qo‘shimcha qildi.
Rossiya Tergov qo‘mitasi, prokuratura va Yeyskdagi aviahalokat sabablarini aniqlashga jalb qilingan boshqa tuzilmalar samolyot halokati sabablari haqida hali rasmiy bayonot bermadi.
17-oktabr oqshomida Yeysk shahridagi to‘qqiz qavatli bino yaqinida Su-34 bombardimonchi samolyoti halokatga uchragan edi. Samolyot uchuvchilari parashyutda sakrashga muvaffaq bo‘lgan.
Halokat joyida yong‘in sodir bo‘lgan. Yong‘in turar joy binosiga o‘tib, 70 dan ortiq xonadon zarar ko‘rgan. So‘nggi ma’lumotlarga ko‘ra, 15 kishi halok bo‘lgan, 20 dan ortiq kishi jarohatlangan.
Izoh (0)