“Ukraina de-fakto NATOga qo‘shildi” — Ukraina Mudofaa vaziri Aleksey Reznikov

Ukraina amalda allaqachon NATO a’zosi. Bu haqda Ukraina Mudofaa vazirligi rahbari Aleksey Reznikov alyans bosh kotibi Yens Stoltenberg bilan uchrashuvdan so‘ng Twitter’da ma’lum qildi.

“NATO bosh kotibi Yens Stoltenbergga Ukrainani qo‘llab-quvvatlagani uchun minnatdorlik bildiraman. Biz uzoq yo‘lni bosib o‘tdik va de-fakto alyansga qo‘shildik”, — deb yozadi vazir.

Reznikovning so‘zlariga ko‘ra, Ukraina “erkin dunyo xavfsizligi”ga hissa qo‘shmoqda. U muvaffaqiyatli islohotlar mamlakat oldida yangi yo‘llarni ochishiga ishonch bildirdi.

2020-yil iyun oyidan beri Ukraina NATO bilan hamkorlikning maxsus maqomiga ega — bu Ukraina qo‘shinlarining alyans kuchlari bilan o‘zaro hamkorligini oshirishga imkon beradi, ammo kelajakda NATOga soddalashtirilgan tartibda yoki aniq kirishini anglatmaydi.

30-sentabr — Rossiya prezidenti Vladimir Putin Ukrainaning to‘rtta viloyatini Rossiyaga qo‘shib olish to‘g‘risidagi shartnomalarni imzolagan kuni Ukraina prezidenti Vladimir Zelenskiy Kiyev tezlashtirilgan asosda NATOga a’zo bo‘lish uchun ariza berganini ma’lum qildi.

“De-fakto, biz allaqachon NATOga kirganmiz. De-fakto,  Shimoliy Atlantika alyansi standartlariga muvofiqligini allaqachon isbotlaganmiz. Bugun Ukraina buni yuridik ravishda amalga oshirish uchun ariza topshirmoqda”, — dedi Zelenskiy.

NATO bosh kotibi Yens Stoltenberg Ukrainaning alyansga qo‘shilish haqidagi arizasiga izoh berar ekan, NATOga a’zolik to‘g‘risidagi qaror 30 davlatning barchasi tomonidan qabul qilinishi kerakligini, hozirda alyans Ukrainaga Rossiyaning shafqatsiz bosqinidan o‘zini himoya qilish uchun tezkor yordam berishga e’tibor qaratayotganini aytdi.

Oq uy jarayonni boshqa vaqtda muhokama qilish kerak, deb hisoblamoqda.

Yevropaning o‘ndan ortiq mamlakati Ukrainaning NATOga qo‘shilishini qo‘llab-quvvatlab chiqdi. Bolgariya prezidenti Rumen Radev esa bunga qarshi ekanini bildirdi.