Toshkent shahri havosi 2-oktabr kuni erta tongda bir muddat nafas olib bo‘lmaydigan darajada ifloslangan. Bu haqda “O‘zgidromet” mutaxassisi Erkin Abdulahatov yozmoqda.

Mutaxassis BBC jurnalisti Ibrat Safoning Toshkent 2–3 yil ichida yashab bo‘lmaydigan shaharga aylanib qolishi,  havo shu qadar iflos ekanidan zahar hatto jigarrang tusda ko‘zga ko‘rinayotgani haqida yozib qoldirgan fikri yuzasidan o‘z munosabatini bildirib o‘tgan.

Ha, poytaxt havosi muttasil bo‘lmasa-da, ora-orada nafas olib bo‘lmas darajada ifloslanayotganidan xavotirga tushasan. Ba’zan o‘ta zich transport harakati effekti “O‘zgidromet” statsionar postlari ma’lumotida ham ko‘rinib qoladi.

Masalan, 2-oktabr erta tong soat 07:00 da poytaxt havosi bir muddat nafas olib bo‘lmaydigan darajada ifoslandi. Asosiy manba karbonat angdridning keskin oshib ketishida ko‘rindi. O‘shanda PM-2,5-mayda dispers zarrachasi ham me’yordan ortib ketdi.

Mediklarga ma’lumki, soch tolasidan 40 barobar kichkina, deyarli ko‘rinmas PM-2,5-mayda dispers zarrachalarining havoda me’yordan ko‘p bo‘lishi kishilar nafas olganda hech qanday to‘siqlarsiz, o‘pka to‘qimalariga urilib, to‘g‘ridan to‘g‘ri qon orqali yurakka yetib borish xususiyatiga ega. Va bu, tabiiyki, inson salomatligi uchun o‘ta xavfli jarayon ekani kundek ravshan.

Ekologiya, atrof-muhitga e’tiborli bo‘laylik, do‘stlar! Poytaxt havosidagi vaziyat va kelgusi prognozlar shundoq ham u darajada havas qilarli emas, — deb yozadi mutaxassis.