Farg‘onada yoshlar ta’lim markazi foydalanishga topshirildi. Bu yerda IT va ingliz tili bepul o‘qitiladi

Farg‘ona shahrida Janubiy Koreya kompaniyasi tomonidan barpo etilgan yoshlar ta’lim markazi foydalanishga topshirildi. Bu haqda “Daryo” muxbiri Azizjon Ermatov xabar berdi.

Qayd etilishicha, Posco International Textile kompaniyasi tomonidan markaz qurilishi va jihozlash ishlari uchun 550 ming dollar miqdorida mablag‘ sarflangan.

Sakkiz oyda qurilib, foydalanishga topshirilgan markazda yaqin hududlarda yashovchi yoshlarga ingliz tili va axborot texnologiyalari bo‘yicha 3 oylik bepul o‘quv kurslari tashkil etilgan. Hozirda bu yo‘nalishda 20 nafar o‘quvchi qabul qilingan bo‘lsa, kelgusida ularning soni 60 nafarga yetadi.

Shuningdek, markazda Posco International Textile korxonasida faoliyat olib boruvchi xodimlar uchun kasbiy malaka oshirish kurslari ham yo‘lga qo‘yilishi ko‘zda tutilgan.

Markazning foydalanishga topshirish marosimida Farg‘ona viloyati hokimi Xayrullo Bozorov, Koreya Respublikasining mamlakatimizdagi favqulodda va muxtor elchisi Kim Xi Sang ishtirok etdi.