Shavkat Mirziyoyev rasmiy tashrif bilan Vengriyaga jo‘nab ketdi

Vengriya tomonining taklifiga binoan, Shavkat Mirziyoyev 3-oktabr kuni rasmiy tashrif bilan ushbu mamlakatga jo‘nab ketdi, deb xabar bermoqda prezident matbuot xizmati.

Tashrif dasturiga muvofiq Budapesht shahrida Vengriya prezidenti Katalina Novak bilan uchrashuv va bosh vazir Viktor Orban bilan muzokaralar rejalashtirilgan.

Bu muloqotlarda strategik sheriklik munosabatlarini yanada rivojlantirish va ustuvor sohalarda ko‘p qirrali hamkorlikni kengaytirishning dolzarb masalalari ko‘rib chiqiladi.

Shuningdek, xalqaro va mintaqaviy ahamiyatga molik masalalar yuzasidan fikr almashiladi.

Prezident, Vengriyaning yetakchi kompaniyalari rahbarlari bilan ham uchrashuv o‘tkazadi.

Bo‘lajak uchrashuv ikki mamlakat yetakchilarining o‘tgan yil mart oyida Toshkent shahrida o‘tgan uchrashuvida erishilgan kelishuvlarga muvofiq, davlat rahbarining javob tashrifidir. Muzokaralar yakunida qo‘shma bayonot va ikki tomonlama hujjatlarning salmoqli to‘plamini imzolash rejalashtirilgan.