O‘zbekistonda muomaladagi naqd pul miqdori urush boshlangandan beri birinchi marta kamaydi

O‘zbekistonda muomaladagi naqd pul miqdori 42,3 trln so‘mga yetdi. Bu haqda Markaziy bank hisobotidan ma’lum bo‘ldi.

Muomalaga chiqarilgan naqd pullar may oyida 3,7 trln so‘mga ko‘paygan bo‘lsa, iyun oyida bu ko‘rsatkich 3,6 trln so‘m bo‘lgan edi. 

Iyul oyida naqd pul miqdori ko‘payishi sekinlashdi va 1,9 trln so‘mga o‘sdi. Avgust oyida esa fevral oyidan beri ilk bor bu ko‘rsatkich kamaydi — 79 mlrd so‘mga. Natijada 1-avgust holatiga ko‘ra, qariyb 42,3 trln so‘m bo‘lib turibdi.

May oyida keng ma’nodagi pul massasi rekord darajada ko‘payib, (+13,3 trln so‘m)  158,5 trln so‘m bo‘lgan edi. Iyunda esa bu ko‘rsatkich deyarli o‘zgarishsiz qoldi. Iyulda 159,1 trln so‘mga yetdi.

Avgust oyida keng ma’nodagi pul massasi 9 trln so‘mga oshgan va bu yangi rekord hisoblanadi. 

Shuningdek, o‘tgan oyda milliy valyutadagi jami pul massasi qariyb 8 trln so‘mga oshib, 122,7 trln so‘mni tashkil etgan.

Markaziy bank tomonidan joriy yilning 6 oyi mobaynida muomalaga qo‘shimcha 13,6 trln so‘m naqd pullar chiqarildi. 

Bundan tashqari, naqd pulga bo‘lgan talabni qondirish maqsadida, 15-iyuldan O‘zbekistonda 200 ming so‘mlik banknota muomalaga kiritildi. 

Avvalroq O‘zbek so‘mi avgust oyida 1,4 foizga mustahkamlangani haqida xabar berilgan edi.