Rossiyadan Osiyoga neft eksporti kamayadimi?

AQSHning S&P Global Commodity Insights axborot agentligi Rossiyadan Osiyoga neft eksporti haqida ma’lumot berdi. Bu haqda “TASS” xabar bermoqda.

Unga ko‘ra, Osiyo mamlakatlari tomonidan sotib olingan Rossiya neftining hajmi yaqin kelajakda kamayishi dargumon.

Biroq narxlarning yuqori chegarasini joriy etish va Xitoydan talabning tiklanishini kutish jahon yoqilg‘i bozorida noaniqlikni keltirib chiqarmoqda.

Biz, albatta, Rossiyadan xomashyo sotib olamiz, chunki ular arzon. Biroq 5-dekabr arafasida xaridlar to‘lqini kuchli dollar va narx siyosatidagi noaniqlik tufayli katta bo‘lishi kutilmayapti, — deydi Xitoy vakili.

2022-yil davomida Rossiyaning Xitoyga neft eksporti katta hajmga ega bo‘lib, yanvardan avgustgacha kuniga o‘rtacha 1,71 million barrelni tashkil etdi, bu 2021-yilning shu davriga nisbatan 7,3 foizga ko‘p.

Hindiston, S&P Global ma’lumotlariga ko‘ra, iyul oyida kuniga taxminan 950 million barrel va iyun oyida kuniga 970 million barrel Rossiya neftini import qilgan.

Rossiya yoqilg‘isining Hindiston xaridlaridagi ulushi so‘nggi uch oyda 18-20 foiz darajasida barqarorlashdi.

Biz neftni Rossiyadan, shuningdek, uni raqobatbardosh narxlarda ta’minlovchi boshqa yetkazib beruvchilardan sotib olamiz, — deydi Hindiston davlat neft va gaz kompaniyasi ONGC Videsh moliyaviy direktori Pomila Jaspal.

Yevropa Ittifoqi va AQSH tomonidan Rossiya neftini sotib olishga qo‘yilgan embargo narxlarning keskin oshishiga olib keldi, bu esa Rossiyaga katta hajmdagi xomashyoni boshqa bozorlarga, birinchi navbatda, Hindiston va Xitoyga yo‘naltirish imkonini berdi.