Zelenskiy Qrimni diplomatiya yo‘li bilan Ukrainaga qaytarish mumkinligini aytdi

Ukraina prezidenti Vladimir Zelenskiy Qrimni diplomatiya yo‘li bilan Ukraina nazoratiga qaytarish mumkinligini aytdi.

Shunday bo‘lishi mumkin. Albatta, Ukrainadagilar bu masalani diplomatik yo‘l bilan hal etishni ko‘proq qo‘llab-quvvatlamoqda. Ammo bu masalani qaysi doiradagi odamlar, qachon muhokama qilishini hozir ayta olmayman, — dedi u.

Zelenskiy bunday bayonotni Reuters muxbirining Qrimda ko‘p sonli Rossiya qo‘shinlari joylashganini hisobga olib, Ukraina tomonidan yarim orolni qaytarish istiqbollari haqidagi savoliga javoban berdi.

Uning ta’kidlashicha, Ukraina “barcha yerlarini qaytarib olgandan keyingina xotirjam yashay oladi”.

Boshqa imkoni yo‘q, oddiy chiqish yo‘li yo‘q, hududlarni deokkupatsiya qilish zarur, — dedi u.

Urushning dastlabki haftalarida Ukraina hukumati Qrimga egalik qilish masalasida Rossiya bilan “murosa” izlash istagini bildirgandi, xususan, masalani 15 yil davomida harbiy yo‘l bilan hal qilishdan bosh tortgani haqida eslatgan. Hozir Kiyev Rossiya kuchlari Ukraina hududlaridan butunlay chiqib ketganidan keyingina u bilan muzokaralar o‘tkazishini ta’kidlamoqda.

Avgust oyida Ukraina harbiylari Qrimdagi Rossiya aviabazalariga zarbalar bergandi. Sentabr oyi boshida Ukraina Qurolli kuchlari Bosh qo‘mondoni Valeriy Zalujniy 2023-yildagi urush istiqbollari haqidagi maqolasida Qrimni ozod qilish uchun harbiy operatsiya o‘tkazishni istisno qilmagan va buning uchun “yetakchi (G‘arb) mamlakatlarning ishlab chiqarish bazasi va zaxiralaridan foydalanish zarurligini ta’kidlagan.