“O‘zavtosanoat”ning foydasi qariyb ikki barobarga ko‘paydi

“O‘zavtosanoat”ning 2022-yilning yanvar—avgust oylaridagi sof foydasi  241 mlrd so‘mni tashkil etdi. Bu haqda “Daryo”ga kompaniya moliyaviy hisobotidan ma’lum bo‘ldi.

Bu ko‘rsatkich 2021-yilga nisbatan deyarli ikki baravar oshdi — o‘shanda foyda 136 mlrd so‘m bo‘lgan edi. 

Mahsulot tannarxi ham sezilarli darajada oshdi – 8,4 trillion so‘mdan 15,8 trillion so‘mga yetdi. Kompaniya dividentlar shaklida 150 mlrd so‘m daromad olgan. Bu o‘tgan yilga nisbatan 3 barobar ko‘pdir. 

“O‘zavtosanoat” yil boshidan beri 16,5 milliard so‘m soliq to‘lagan.

Bundan tashqari kompaniya valyuta kursi farqidan 7,2 mlrd so‘m zarar ko‘rgan. Zarar miqdori o‘tgan yilga nisbatan 2,5 barobar ko‘p. 

Iyul oyidagi hisobotda “O‘zavtosanoat”ning foydasi o‘tgan yilga nisbatan 25 mlrd so‘mga kamaygan edi.

Avvalroq UzAuto Motors sof foydasi 2 trln so‘mga yaqinlashgani haqida xabar berilgan edi.