PFL maydon chetidagi to‘plarni yashirgani uchun “Navbahor”ni, qaydnomani kech bergani uchun “Paxtakor”ni jarimaga tortdi
Professional futbol ligasi (PFL) O‘FA Tartib-intizom qo‘mitasining 9-sentabr kungi yig‘ilishida esga olingan, biroq qo‘mitaning vakolatiga kirmaydigan ayrim qoida buzilish holatlari bo‘yicha jarimalar belgiladi.
O‘zbekiston Kubogi chorak finali doirasida kechgan “Navbahor” — “Paxtakor” uchrashuvida (2:1) mehmonlar o‘yin qaydnomasini reglamentda ko‘rsatilgani kabi 90 daqiqa oldin emas, 60 daqiqa avval taqdim etgan. Ushbu holat bo‘yicha “Paxtakor” klubiga jarima qo‘llanilgan.
Ushbu uchrashuv vaqtida “Navbahor” rasmiylari maydon chetida to‘p uzatuvchi bolalarning qo‘lidagi to‘plarni yashirish orqali o‘yin tempiga ta’sir qilmoqchi bo‘lgan. Reglamentga ko‘ra, maydon chetida kamida 8 ta zaxira to‘pi bo‘lishi kerak. PFL vakillarining aralashuvidan keyin ham maydon chetida uchta to‘p qoldirilgan. Mazkur holat sabab Namangan klubi jarimaga tortilgan.
Qayd etilishicha, Superliga doirasida o‘tgan “Paxtakor” — “Navbahor” uchrashuvida (2:1) ham shunday holat toshkentliklar klubi tomonidan sodir etilgan. Biroq PFL komissarining aralashuvi bilan to‘plar joyiga qaytarilgan.
Superliga 18-turidan o‘rin olgan “Paxtakor” — “Metallurg” uchrashuvidan keyin mehmonlar matbuot xizmati tomonidan klub rasmiy sahifalarida uchrashuv hakamlariga nisbatan ayblovlar e’lon qilingan. Buning ortidan “Metallurg” jarimaga tortilgan.
Mavzuga doir: “Nasaf” bosh murabbiyi Ro‘ziqul Berdiyev 3 ta o‘yinga chetlatildi
