Tadbirkorlik subyektlari vakillaridan Respublika shtabiga 12 mingdan ortiq murojaat kelib tushdi

AOKAda o‘tkazilgan brifingda Investitsiyalar va tashqi savdo vazirligi boshqarma boshlig‘i o‘rinbosari Dadaxon Jumaniyozov O‘zbekiston prezidentining tadbirkorlar bilan “Ochiq muloqot”i yakunlari bo‘yicha ma’lumot berdi.

Bu yil “Ochiq muloqot” tadbiriga tayyorgarlik mutlaqo yangicha tizim asosida olib borildi.

Xususan, joriy yilning 17–18-avgust kunlari “Tadbirkorlar bilan muloqot haftaligi” doirasida 9 ta mavzuda panel sessiyasi bo‘lib o‘tdi.

Mazkur tadbir doirasida 2 kun davomida jami 3 500 dan ortiq tadbirkor, shundan markaziy studiyadan 1 300 ga yaqin va hududiy studiyalaridan 2 250 ga yaqin tadbirkor ishtiroki ta’minlandi.

Natijada, tadbirkorlarning 531 tasi o‘z muammo va takliflarini bildirdi. Ularning 255 ta individual xarakterga ega bo‘lgan muammoli masala, 76 ta tizimli muammo, 50 ta taklif eshitildi. Shuningdek hududlardan ishtirok etgan 37 ta tadbirkor ham muammo va takliflarni aytib o‘tdi.