O‘zbekiston aholisining ichimlik suvi bilan ta’minlanganlik darajasi 2026-yilda 87 foizga yetkaziladi

Hozirgi vaqtda O‘zbekiston aholisining markazlashgan ichimlik suvi bilan ta’minlanganlik darajasi 71,2 foiz, 2026-yilda bu ko‘rsatkich 87 foizga yetkaziladi. AOKAda o‘tkazilgan brifingda “O‘zsuvta’minot” AJ axborot xizmati rahbari Akmal Murodov bu haqda ma’lum qildi.

Qayd etilishicha, Murodov “Obod qishloq” va “Obod mahalla” davlat dasturlari doirasida ichimlik suvi ta’minoti va oqova suv tizimlarini rivojlantirish bo‘yicha amalga oshirilgan ishlar yuzasidan ma’lumot bergan.

Unga ko‘ra, 2022-yilda davlat dasturlari doirasida respublika hududlaridagi 368 ta obyektda qurilish-montaj ishlarini amalga oshirish uchun 1 trillion so‘m ajratish ko‘zda tutilgan bo‘lib, ushbu mablag‘lar hisobidan 4057 kilometr ichimlik va oqova suv tarmoqlarini hamda 403 ta ichimlik va oqova suv inshootlarida qurilish va rekonstruksiya qilish ishlarini amalga oshirish rejalashtirilgan.

1-avgust holatiga ko‘ra, 200,1 milliard so‘m moliyalashtirilib, ushbu mablag‘lar hisobidan 1054 kilometr ichimlik va oqova suv tarmoqlari tortildi, 41 ta ichimlik va oqova suv inshootlarida qurilish va rekonstruksiya qilish ishlari amalga oshirildi.