Braziliya prezidenti Jair Bolsonaru bloger bilan mushtlashdi (video)

Braziliya prezidenti Jair Bolsonaru bloger bilan mushtlashib, uning mobil telefonini tortib olishga urindi. Bu haqda Daily Mail xabar berdi.

Nashrning yozishicha, Braziliya yetakchisi mamlakat poytaxtidagi prezident qarorgohi Palasio da Alvorada yaqinida o‘z tarafdorlari bilan uchrashgan. Shu payt mahalliy bloger Vilker Leao olomon orasidan o‘tib, siyosatchiga yaqinlashgan. Leao telefonida o‘zini tasvirga olib, prezidentga qayta-qayta baqirgan va uni “qo‘rqoq”, “tanbal” hamda Kongressdagi “ochko‘z”, fraksiyaning “erkatoyi” deb atagan.

Bolsonaru esa avvaliga mashinasiga o‘tirgan, biroq keyin tushib, blogerning telefoniga qo‘l cho‘zgancha uning ko‘ylagi va bilagiga chang solgan. Natijada qo‘riqchilar blogerni nariga sudrab ketgan.

“Buni tasvirga olmanglar! Bu uning norozilik bildirish huquqi, lekin u beadablik qildi”, — deydi Braziliya prezidenti o‘z tarafdorlariga.

Voqeadan so‘ng Bolsonaru va Leao besh daqiqa davomida sud bitimlari, budjet, soliq islohoti va qurolga egalik qilish haqida suhbatlashgan, shundan so‘ng Braziliya rahbari mashinasiga qaytgan.

Eslatib o‘tamiz, Bolsonaru avval bir necha bor, xususan, OAV vakillariga nisbatan dushmanlik harakatlarini ko‘rsatgan. Ilgari u noqulay savol tufayli jurnalist bilan janjallashib ketay degan. Bundan tashqari, siyosatchi jurnalist haqida kamsituvchi fikrlar bildirgan. Shundan keyin unga tovon to‘lashga majbur bo‘lgan.