Yevropadagi energetika inqirozi tufayli dunyoda o‘g‘it tanqisligi yuz berishi mumkin

Yevropada o‘g‘it ishlab chiqarishni to‘xtatuvchi energiya tanqisligi dunyo fermerlarini oziq-ovqat yetishtirish uchun muhim bo‘lgan ozuqaviy moddalardan kamroq foydalanishga majbur qilmoqda. Bu haqda Bloomberg xabar berdi.

Hisob-kitoblarga ko‘ra, asosiy xomashyo bo‘lgan gaz narxining ko‘tarilishi Yevropa azotli o‘g‘itlar quvvatining chorak qismini qisqartirgan. Endi inqiroz yanada yomonlashadi, degan xavotirlar kuchaymoqda.

Yevropa uchun bu ishlab chiqarishning qisqarishi va azotli mahsulotlar ishlab chiqariladigan ammiak importiga ko‘proq qaramlikni anglatishi mumkin.

Bu boshqa sohalarda ham ta’sir qiladi. Xalqaro o‘g‘itlar assotsiatsiyasiga ko‘ra, yuqori narxlar va ta’minotning keskinligi tufayli fermerlar kelgusi mavsumda global o‘g‘itdan foydalanishni 7 foizga qisqartirishi mumkin.

Dunyo narxlarning ko‘tarilishi va ocharchilikning kuchayishi bilan kurashayotganda, bu hosilni cheklash xavfini kuchaytiradi.

Ma’lumotlarga ko‘ra, kelgusi mavsumda o‘g‘itlardan foydalanishning eng katta pasayishi Janubiy Afrikada kuzatiladi — 23 foiz.

O‘tgan oylardagi pasayishdan so‘ng, o‘g‘it narxlari yana ko‘tarila boshladi, chunki Rossiyadan yetkazib berishning kamayishi va talabni oshirgan Yevropagi jazirama tufayli gaz narxi ko‘tarildi.

Yevropa muammolari

Ma’lumotlarga ko‘ra, hozirda ammiakni Yevropaga import qilish uni mintaqaning o‘zida ishlab chiqarishdan ko‘ra ancha arzon.

Har yili 20 million tonna ammiak ishlab chiqaradigan Yevropa inqirozni yengillashtirish uchun oyiga yana 200 ming tonna import qilishi kerak.

Birgina iyul oyida Yevropaning 10 ta o‘g‘it zavodi inqiroz tufayli yopildi yoki ishlab chiqarishni qisqartirdi. Vaziyat yanada yomonlashishi mumkin.

Shu tufayli, kelgusi yil uchun o‘g‘it yetishmaydi, degan xavotirlar kuchaymoqda.