“Bu odamlarda tibbiy madaniyat yetarli darajada emasligining belgisi”. Xalq tabobati assotsiatsiyasi raisi internetda tarqalgan qo‘qonlik tabib bo‘yicha munosabat bildirdi (video)

Ijtimoiy tarmoqlarda “qo‘l harakati bilan davolovchi tabib” videosi tarqalmoqda. Izohlarda bu tabib O‘zbekiston Tabobat akademiyasida rasmiy ro‘yxatdan o‘tgani aytilmoqda. Mazkur videolarda tabib deb atalayotgan erkak bemorlarning tanasi atrofida turli qo‘l harakatlarini bajarayotgani aks etgan. Shundan so‘ng tabib bemordan “Yaxshi bo‘ldingizmi?” deb so‘rab, bemorlardan tasdiqlatib olmoqda va ushbu videolarni o‘zining ijtimoiy tarmoqlardagi sahifalariga joylamoqda.

“Daryo” mazkur tabib bo‘yicha izoh olish uchun Xalq tabobati assotsiatsiyasi bilan bog‘landi. Tashkilot raisi Ro‘zimuhammad Xonnazarov bu bo‘yicha quyidagi fikrlarni bildirib o‘tdi.

“Mazkur videodagi shaxs qo‘qonlik Iqbol Soliyev. Bu insonni men yaxshi taniyman. Bir necha bor suhbatlashganman. Chunki biz bugun tabiblar va tabiblikka da’vogarlar haqida ma’lum bir darajada ma’lumotlarga egamiz. Internetda tarqalayotgan xabarlarda u O‘zbekiston Tabobat akademiyasida rasmiy ro‘yxatdan o‘tganligi ta’kidlangan. Hozirgi paytda qaysi tabibni uchratsangiz, ‘falon akademiyaning a’zosi’ yoki ‘akademigi’ bo‘lib chiqadi. Albatta bu alohida bir mavzu bo‘lib, hali bunga alohida to‘xtalib o‘tamiz.

Avvalo shuni ta’kidlab o‘tish kerakki, xalq tabobati tabiiy giyohlar, hayvon mahsulotlari, ma’danlar yordamida turli kasalliklarni davolashdan iborat amaliy faoliyatdir.

Shu bilan birga, xalqimiz orasida azaldan silovchilar, kinnachilar, duoxonlar mavjud bo‘lib, ular qo‘l berish yo‘li bilan o‘z iqtidorlarini xalq xizmatiga yo‘naltiradi. Bu insonlar o‘zlarini ‘g‘ayrioddiy’ inson ekanliklarini bot-bot ta’kidlab, o‘zlarini ijtimoiy tarmoqlar orqali mashhur qilishga harakat qiladi. Aniqroq qilib aytadigan bo‘lsak, mijoz qidiradi.

Videodagi tabib esa oddiy qo‘l harakatlari yordamida bir lahzada insonlarga shifo ulashayotgani aytilmoqda. Men bu insonning harakatlarini tasdiqlash yoki inkor qilish fikridan yiroqman. Chunki insonlarda uchrab turadigan ‘g‘ayrioddiylik’ haqida hazrat Ibn Sinodan so‘rashganda u zot ‘Ushbuni rad etishga shoshilmang’ degan ekanlar.

Tabobatda bioenergiya bilan davolash amaliyoti mavjud. Buni inkor etmayman. Bunda insondagi 5 ta omil — harorat (36,6 S), bioquvvat, magnit maydoni, infraqizilnur, energiya axboroti orqali bemor kishiga ta’sir o‘tkaziladi. Buning uchun muayyan vaqt talab qilinadi.

Ammo videodagi holat rost bo‘lsa, agar bu tabib qo‘l harakatlari bilan og‘ir bemolarni shunday osonlik bilan bir lahzada davolayotgan bo‘lsa, atrofda kasal odam qolmas edi. Kasalxonalarimizda shifo istab yotgan ko‘plab og‘ir bemorlar, nogironlar, xastalar bor. Unda nega ularni oyoqqa turg‘izib yubormayapti?

Bunday holatlarning yuzaga kelishiga sabab, avvalambor, odamlarning tibbiy bilim va madaniyati yetarli darajada emasligi hisoblanadi. Shuningdek, ko‘rsatilayotgan tibbiy xizmatlardan shifo topmayotgan bemorlar mo‘jiza istab to‘g‘ri shu kabi shaxslarning tuzog‘iga boradi. Odamlarimiz sodda, samimiy deymiz. Bu soddalikdan ham ko‘ra ko‘proq tibbiy madaniyat, birlamchi tibbiy bilimning yo‘qligidan darak beradi.

Masalan, Germaniyada hech qachon to‘satdan bunday tabiblar paydo bo‘lgani haqida eshitmaysiz. Chunki u yerdagi oddiy aholining tibbiy bilimi bizdagi ba’zi soxta tabiblar va shifokorlarnikidan yaxshiroq deb o‘ylayman. Shu sababli kimdir qo‘l bilan davolayman, deb da’vo qilib chiqadigan bo‘lsa, unga savol berishni bilishadi.

Bizda ham aholining tibbiy madaniyati va ko‘rsatilayotgan tibbiy xizmatlar sifati oshsa, ayrim qo‘shtirnoq ichidagi tabiblarga bo‘lgan ommaviy qiziqishlar o‘z-o‘zidan barham topadi”, — dedi Xalq tabobati assotsiatsiyasi raisi Ro‘zimuhammad Xonnazarov.