Toshkent shahri Yunusobod tumanida avtomashinasida piyodani urib, voqea joyidan qochib ketgan haydovchi qo‘lga olindi. Bu haqda shahar ichki ishlar bosh boshqarmasi axborot xizmati xabar bermoqda.
Ma’lum bo‘lishicha, 15-avgust kuni taxminan soat 12:50 da Yunusobod tumani Bog‘ishamol ko‘chasida Spark haydovchisi yo‘l chetida turgan piyodani urib yuborgan. Ammo birinchi yordam ko‘rsatmay, voqea joyidan ketib qolgan. Oqibatda piyoda — 1967-yilda tug‘ilgan G.K. (shahar obodonlashtirish boshqarmasi ishchisi) olgan tan jarohatlari sabab voqea joyida halok bo‘lgan.
Avtomashinada piyodani urib, voqea joyidan qochib ketgan haydovchining shaxsi aniqlandi. U 1990-yilda tug‘ilgan Yu.R. ekani ma’lum bo‘ldi. Hozirda haydovchi ushlangan. Mazkur holat yuzasidan Toshkent shahri IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)