Rossiya Zaporojye atom elektr stansiyasining o‘qqa tutilishi tufayli 11-avgust kuni BMT Xavfsizlik kengashi majlisini o‘tkazishni talab qildi, deb yozadi “RBK”.
Rossiya tomoni “so‘nggi kunlarda Zaporojye AESga Ukraina tomonidan bo‘layotgan hujumlar va ularning ehtimoliy halokatli oqibatlari yuzasidan” brifing o‘tkazilishini so‘ragan.
Shuningdek, Rossiya MAGATE bosh direktori Rafael Grossi ma’ruzachi sifatida qatnashishini so‘ragan.
Ayni paytda AQSH Rossiyani Zaporojye AES ustidan nazoratni Ukrainaga berishga chaqirmoqda.
“Biz Rossiyani Ukraina yadro obyektlarida yoki ularning yaqinida barcha harbiy operatsiyalarni to‘xtatishga, shuningdek, ushbu obyektlar ustidan to‘liq nazoratni Ukrainaga qaytarishga chaqirishda davom etamiz”, — dedi Oq uy matbuot kotibi Karin Jan-Pyer brifing chog‘ida.
Zaporojye AES — Yevropadagi eng yirik atom elektr stansiyasi. U Energodar shahrida joylashgan. 28-fevral kuni, Ukrainada harbiy operatsiya boshlanganidan keyin to‘rt kun o‘tib, Rossiya Mudofaa vazirligi Zaporojye AES hududi nazorat ostiga olinganini ma’lum qilgandi.
7-avgust kuni Energodar harbiy-fuqarolik ma’muriyati Ukraina qo‘shinlari tunda Zaporojye AESga “Uragan” baravar o‘t ochish reaktiv tizimlari bilan zarbalar berganini ma’lum qildi. Raketa parchalari ishlab turgan energoblok yaqiniga kelib tushgani da’vo qilindi. Rossiya Mudofaa vazirligi ma’lumotlariga ko‘ra, AES va Energodar hududiga Ukraina tomonidan 152 millimetr kalibrli 20 ta snaryad otilgan.
“AESda 3-energoblok qurilmalarining bir qismi tokdan uzilib qoldi, 4-energoblok ishlab chiqarayotgan quvvat kamaydi, vodorod quvuriga zarar yetdi, vodorod stansiyasida vodorodning alanga bo‘lib yonishi yuz berdi”, — deb Rossiya mudofaa idorasi elektr stansiyasiga yetgan zararni izohlagan edi.
Avvalroq Rossiya hukumati Xalqaro atom energiyasi agentligi (MAGATE) rahbariyatiga delegatsiyaning AESga tashrifini tashkillashtirishda yordam berishga tayyorligini bildirgan edi. BMT bosh kotibi Antoniu Guterrish MAGATE inspektorlariga elektr stansiyasiga kirish imkoniyatini berishga chaqirgan va unga berilgan zarbalarni “o‘z joniga qasd qilish” deb atagan edi. Ayni vaqtda Rossiya TIV BMT kotibiyatini tashrifga to‘sqinlik qilishda ayblamoqda (MAGATE BMT rahbarligi ostida ishlaydi).
Rossiya tomoni Zaporojye AESning Ukraina tomonidan davomli o‘qqa tutilishi global texnogen halokatga olib kelishi mumkinligi, stansiya xavf ostida turgani haqida ogohlantirdi.
Izoh (0)