Lionel Messi faoliyatidagi sovrinlar sonini 41 taga yetkazdi. Faqat bir futbolchi bu borada undan oldinda

Lionel Messi “PSJ” safida Fransiya Superkubogida g‘alaba qozondi.

Argentinalik hujumchi parijliklarning mavsumdagi ilk goliga mualliflik qildi. Bundan tashqari bu Leo uchun finallarda urilgan 32-golga aylandi.

Messi faoliyatidagi 41-sovrinini qo‘lga kiritdi va Dani Alves bilan oradagi farqni qisqartirdi. Braziliyalik jami 46 ta sovringa ega chiqqan.

Bunga qadar argentinalik hujumchi “Barselona” safida 10 marta La Liga, 4 marta Chempionlar Ligasi, 8 marta Ispaniya Superkubogi, 7 marta mamlakat Kubogi, 3 martadan klublar o‘rtasidagi Jahon chempionati va Yevropa Superkubogida zafar quchgan. “PSJ” bilan esa Fransiya chempionligiga erishgan.

Argentina terma jamoasi bilan Amerika Kubogini qo‘lga kiritgan, shuningdek, Olimpiada va yoshlar o‘rtasidagi Jahon chempionatida shohsupaga ko‘tarilgan.

Rekordchi Alvesning sovrinlari soni borasida ikki xil statistika mavjud. Ba’zi manbalarda 46 ta sovrin ko‘rsatilgan, ammo ayrim ma’lumotlarda Alvesning erishgan sovrinlari 42 ta ekani qayd etilgan.

2001-yilgi Baiya chempionligi va Nordeste Kubogidagi g‘alaba so‘roq ostida qolmoqda. O‘shanda Alves “Baiya” safida o‘ynagan. Bundan tashqari 2018-yilgi Fransiya Superkubogi ham hisobga kiritilmagan, chunki Alves o‘sha o‘yinda “PSJ” qaydnomasidan joy olmagan. Shuningdek, Danining 2003-yilgi yoshlar o‘rtasidagi Jahon chempionatida Braziliya bilan chempionligi ham hisobga kirmaydi degan taxminlar mavjud.