O‘zbekistonda ichimlik suvi eng arzon bo‘lgan hudud Toshkent shahri, eng yuqorisi esa Navoiy viloyati hisoblanadi. Bu haqda “O‘zsuvta’minot” AJ boshqarma boshlig‘i Bekzod Shoyimov “Daryo” muxbiriga bergan intervyusida ta’kidlab o‘tdi.
“Ichimlik va oqova suv xizmatlari uchun tariflar xarajatlardan kelib chiqib shakllantiriladi. Ya’ni ishlab chiqarish, elektr energiya, amortizatsiya, hukumat kafolati ostida olingan xalqaro moliya kreditlari, sohadagi xodimlarning ish haqi kabi xarajatlar jamlanib, so‘ngra tarif belgilanadi.
Bugungi kunda tariflar hududlar kesimida turlicha bo‘lib, eng arzoni Toshkent shahriga to‘g‘ri keladi. Poytaxtda 1 kub metr ichimlik suvi narxi 400 so‘m. Eng yuqori narx Navoiy viloyatida – 1 kub metr ichimlik suvi 3 ming so‘mni tashkil etadi.
Tariflarning hududlar bo‘yicha har xil ekanligi xarajatlar bilan bog‘liq. Toshkent shahrida ichimlik suvining narxi arzonligiga sabab shuki, Bo‘zsuv kanali orqali o‘zi oqar yo‘li bilan ichimlik suvi olinadi, ya’ni elektr energiyasi kam ishlatiladi. Buxoro, Navoiy viloyatlarida yer ostida yaroqli ichimlik suvi zaxiralari yo‘qligi tufayli Samarqand viloyatining Kattaqo‘rg‘on shahridan — 200 kilometr masofadan ichimlik suvi yirik magistral quvurlar orqali yetkazib beriladi. Tabiiyki, elektr energiyasi, ish haqi va boshqa xarajatlarning yuqoriligi narxga ham ta’sir ko‘rsatadi”, — deydi Bekzod Shoyimov.
Boshqarma boshlig‘ining qayd etishicha, O‘zbekiston aholisining ichimlik suvidan qarzi o‘sib bormoqda. “O‘zsuvta’minot” 4 million 250 mingta iste’molchiga xizmat ko‘rsatsa, shundan 2 million 400 mingtasi qarzdor abonent hisoblanadi.
“Mamlakatimizda ichimlik suvi arzon bo‘lishiga qaramasdan, may oyi holatiga ko‘ra, aholining 1 trillion 181 milliard so‘m qarzdorligi mavjud. 2022-yil boshiga nisbatan 10 foiz yoki 110 milliard so‘mga oshgan. Qarzdorlik bo‘yicha eng yuqori ko‘rsatkichlar Toshkent shahri (239 milliard so‘m), Toshkent viloyati (139 milliard so‘m) va Andijon viloyati (105 milliard so‘m)da qayd etilmoqda.
Korrupsiyaga qarshi kurashish, isrofgarchilik va qarzdorliklarning oldini olish maqsadida zamonaviy suv hisoblagichlarni o‘rnatish ishlari 2023-yil 1-yanvardan to‘liq amalga oshiriladi. Bugungi kunda Toshkent shahri va Farg‘ona viloyatining bir qancha hududlarida o‘nlab xorij kompaniyalarining zamonaviy suv hisoblagichlari sinov tariqasida o‘rnatilmoqda”, — deydi “O‘zsuvta’minot” AJ vakili.
Izoh (0)