“Konstitutsiyaga o‘zgartirish kiritish bo‘yicha aholidan kuniga 5-6 mingta taklif kelib tushmoqda” — Akmal Saidov

Konstitutsiyaviy komissiyaning navbatdagi yig‘ilishida Oliy Majlis qonunchilik palatasi spikeri o‘rinbosari Akmal Saidov hozirda aholidan kuniga qancha taklif kelib tushayotgani to‘g‘risida ma’lumot berdi.

Saidovga ko‘ra, xatlar orqali, gazeta, radio, televideniyeda bildirilgan, mahallalarda o‘tkazilgan o‘rganishlarda aholi tomonidan aytilgan takliflar jamlangan. Konstitutsiyaviy komissiya raisi o‘rinbosari Qutbiddin Burhonov mana shu yo‘nalishdagi ishlar to‘g‘risida muntazam ravishda komissiyaga axborot berib borgan.

“Qolaversa, noan’anaviy shaklda, ya’ni yangi informatsion texnologiyalarni qo‘llagan holda konstitutsiyaviy islohotlarning muhokamasi boshlandi. Birinchi marta ‘Mening konstitutsiyam’ onlayn platformasi tashkil etildi, Call-markaz, elektron pochta ochildi, maxsus Telegram-bot ishga tushirildi. Fuqarolarimizdan konstitutsiyaviy islohotlarga munosabat bildirishni so‘rab, 3-iyun, 8-iyun va 15-iyun kunlari butun O‘zbekiston aholisiga, ya’ni 30 milliondan ortiq mobil aloqa egalariga SMS’lar jo‘natildi”, — deyiladi xabarda.

Uning ta’kidlashicha, bu ishlarning ijobiy natijasini kelib tushayotgan takliflar soni keskin ortganidan ko‘rish mumkin. “Ilgari kuniga 500 ta atrofida taklif kelib turgan bo‘lsa, aholini axborot texnologiyalari vositalari orqali xabardor qilish jarayonlari boshlangandan keyin kuniga 5-6 mingta taklif tushmoqda”, — deydi u.

Avvalroq Akmal Saidov aholining jabrlangan toifasi o‘lim jazosini tiklash tarafdori ekanini aytib, konstitutsiyaning 24-moddasiga “O‘zbekistonda o‘lim jazosi taqiqlanadi”, degan jumlani qo‘shish taklifini bildirgandi.