Toshkentdagi hukumat mehmonxonasi qariyb 79 mlrd so‘mga sotildi

Toshkent shahar Mirzo Ulug‘bek tumani Sho‘rtepa ko‘chasidagi hukumat mehmonxona bino va inshootlari kimoshdi savdosida sotildi. Bu haqda Davlat aktivlarini boshqarish agentligi xabar berdi.

Obyektning qachon qurilgani noma’lum bo‘lib, unda gaz, suv va elektr tarmog‘i tizimi mavjud. Yer uchastkasining egallagan maydoni — 2,99 gektar.

Kimoshdi savdosida 5 nafar ishtirokchi qatnashdi va mehmonxonaning yakuniy narxi 78,7 mlrd so‘m qilib baholandi.

Auksion g‘olibi “Torgoviy dom metalloinvest vostok” bo‘ldi.

Bu kompaniya 2021-yil 24-dekabrda 10,8 mlrd so‘m ustav kapitali bilan ro‘yxatga olingan. Asosiy faoliyat turi — metall va metall rudalarining ulgurji savdosi.

Kompaniya ta’sischilaridan biri “Lebedinskiy” tog‘-kon boyitish kombinati (51 foiz) — temir rudasini qazib olish va boyitish, metall resurslarini ishlab chiqarish bo‘yicha Rossiya va MDHdagi eng yirik korxona.

Korxona “Metalloinvest” tarkibiga, u esa milliarder Alisher Usmonovning USM xoldingi tarkibiga kiradi.

Avvalroq Toshkentda nomsiz mehmonxona auksionga qo‘yilgani haqida xabar berilgandi.