O‘zbekiston OTMlarida tahsil oluvchi 837 ming nafar talabaning 13 foizi ish bilan band qilingani ma’lum bo‘ldi

O‘zbekistondagi mavjud 159 ta oliy ta’lim muassasasida tahsil olayotgan 837 ming 774 nafar talabaning 106 ming 729 nafari ish bilan band qilingan. Bu haqda Bandlik va mehnat munosabatlari vazirligi tashabbusi bilan tashkil etilgan press-turda ma’lum qilindi.

Vazirlik axborot xizmati rahbari Mavjuda Mirzayevaning OAV vakillariga ma’lumot berishicha, prezident Shavkat Mirziyoyev raisligida 2022-yilning 4-mart kuni bo‘lib o‘tgan videoselektorda ishlashga ehtiyoji bor talabalarga yordam berib, ularning bandligini ta’minlash shartligi belgilab berilgan. Shundan so‘ng vazirlik va vazirlik tarkibidagi tashkilotlar tomonidan bu masalaga jiddiy e’tibor qaratilgan.

“Respublikamizdagi mavjud 105 ta davlat, 24 ta nodavlat va 30 ta xorijiy oliy ta’lim muassasalarida vazirlik tarkibidagi tashkilotlar bilan hamkorlikda talabalarni ishga joylashtirishga ko‘maklashuvchi bandlik markazlari tashkil etildi. Va ayni kundagi holat o‘rganib chiqilganda mavjud 837 ming 774 nafar talabaning 106 ming 729 nafari ya’ni 13,4 foizi o‘qish bilan birgalikda ish bilan ham band qilingani ma’lum bo‘ldi. Biz bugungi press-turimizda Toshkent shahridagi OTMlarda talabalarning ishga joylashish ko‘rsatkichlarini o‘rganyapmiz”, — deydi Mavjuda Mirzayeva.

Mas’ulning ma’lumot berishicha, ayni kunda Toshkent shahridagi OTMlarda tahsil oluvchi talabalarning 30 ming 527 nafari ish bilan band qilingan.

Toshkent Moliya instituti mas’ullarining aytishicha, prezident topshirig‘idan so‘ng institutda 45 nafar talaba OTMning o‘ziga ishga joylashtirilgan. Bundan tashqari institut hududida sartaroshxona, go‘zallik salonlari tashkil qilinib, talabalarning ishga joylashishi amalga oshirilgan.

Al-Xorazmiy nomidagi Toshkent axborot texnologiyalari universiteti mas’uli Akbar Normurodovning ma’lumot berishicha, prezident topshirig‘idan so‘ng universitetning 364 nafar talabasi ishlash ishtiyoqini bildirgan. Ayni kungacha 329 nafar talaba ishga joylashtirilgan.