Amerika razvedkasi Ukrainani Rossiya armiyasi qo‘mondonlik punktlarining harakati to‘g‘risidagi ma’lumotlar bilan ta’minlamoqda. Bu haqda New York Times AQSH hukumatidagi anonim manbalarga tayanib, xabar berdi.
Ushbu razvedka ma’lumotlari Ukrainaga Rossiya armiyasining shtab-kvartirasiga zarba yo‘llashga imkon bergan, bu esa, tasdiqlanmagan ma’lumotlarga ko‘ra, 12 nafar rossiyalik generalning o‘limiga sabab bo‘lgan.
Ukraina AQSH va o‘z razvedkasining ma’lumotlarini birlashtirib zarba bermoqda, deydi manbalar, jumladan, shtab-kvartirada yuqori martabali zobitlar borligini bildiruvchi aloqa to‘lqinlari tutib qolingan.
Shu bilan birga, Nyu-York Times manbalarining aytishicha, Qo‘shma Shtatlar Ukrainaga Rossiya armiyasi yuqori rahbariyatining harakati haqida ma’lumot bermayapti. Tasdiqlanmagan ma’lumotlarga ko‘ra, Rossiya Qurolli kuchlari Bosh shtabi rahbari Valeriy Gerasimov tashrif buyurgan Izyumdagi shtab-kvartiraga hujum Amerika razvedkasining yordamisiz rejalashtirilgan.
AQSH Milliy Xavfsizlik Kengashining rasmiy vakili New York Times gazetasiga Qo‘shma Shtatlarning Ukraina bilan razvedka ma’lumotlarini baham ko‘rishdan maqsad Rossiya generallarini o‘ldirish emasligini aytdi.
Avvalroq Buyuk Britaniya Qurolli Kuchlari vaziri Jeyms Xippi “Ukraina tuprog‘ida o‘lim va qon to‘kilishiga bevosita hissa qo‘shadigan ta’minot zanjirlarini uzish” maqsadida Ukrainaning Rossiya hududidagi nishonlarga zarba berishini “mutlaqo qonuniy” deb atagan edi.
Izoh (0)