Yaponiya tashqi ishlar vaziriga Jahon iqtisodiyoti va diplomatiya universitetining faxriy doktori unvoni berildi
O‘zbekistonga ikki kunlik tashrif bilan kelgan Yaponiya tashqi ishlar vaziri Yosimasu Xayashi 30-aprel kuni Jahon iqtisodiyoti va diplomatiya universiteti professor-o‘qituvchilari va talabalari bilan uchrashdi, deb xabar beradi Tashqi ishlar vazirligi rasmiy vakili.
Yaponiya tashqi ishlar vaziriga Oliy Majlis Senati raisining birinchi o‘rinbosari, JIDU rektori Sodiq Safoyev universitet tarixi va faoliyati, Yaponiyadagi hamkor universitetlar bilan munosabatlarni rivojlantirish bo‘yicha ma’lumotlar, yapon tilini o‘rganish dasturlarini tanishtirgan.
Vazirga JIDU faxriy doktori unvonini berish to‘g‘risidagi universitet Ilmiy kengashining qarori o‘qib eshittirilgan hamda bu haqdagi diplom va mantiya tantanali ravishda topshirilgan.
JIDU faxriy doktori Yosimasu Xayashi universitet professor-o‘qituvchilari va talabalari oldida so‘zga chiqib, Yaponiya Tashqi ishlar vazirligining faoliyati, O‘zbekiston bilan ikki tomonlama hamkorlikning muhim yo‘nalishlari haqida aytib o‘tgan.
Eslatib o‘tamiz, 2021-yilning noyabrida Sodiq Safoyev Yaponiya va O‘zbekiston o‘rtasidagi ikki tomonlama aloqalarni chuqurlashtirish va do‘stona munosabatlarni rivojlantirish yo‘lidagi ko‘p yillik xizmatlari uchun “Ko‘tarilayotgan quyosh ordeni katta tasmasi” ordeni bilan taqdirlangan. “Ko‘tarilayotgan quyosh ordeni katta tasmasi” Yaponiyaning eng yuqori ordeni bo‘lib, u bilan faqat yuqori natijalarga erishgan shaxslar taqdirlanadi va u O‘zbekistonda birinchi marta berilgan.
