Adliya vazirining buyrug‘i bilan Buxoro, Andijon, Xorazm, Toshkent viloyatlari va Toshkent shahri adliya boshqarmalariga yangi boshliqlar tayinlandi. Bu haqda Adliya vazirligi matbuot xizmati xabar berdi.
Anvar Rahmatov Buxoro viloyat adliya boshqarmasi boshlig‘i lavozimiga tayinlandi.
Rahmatov 1982-yilda Buxoro viloyati Romitan tumanida tug‘ilgan, ma’lumoti oliy, 2003-yilda Toshkent davlat yuridik institutini, 2009-yilda Buxoro davlat universiteti (sirtqi), 2010-yilda O‘zbekiston prezidenti huzuridagi Davlat va jamiyat qurilishi akademiyasi (kunduzgi)ni tamomlagan, mutaxassisligi huquqshunos.
U mehnat faoliyatini 2004-yilda Buxoro viloyat adliya boshqarmasi Huquqiy ma’rifat targ‘iboti bo‘yicha yetakchi maslahatchisi lavozimidan boshlab, vazirlik tizimida turli lavozimlarda ishlagan. Rahmatov shu kunga qadar Buxoro viloyat adliya boshqarmasi boshlig‘i o‘rinbosari — yuridik texnikum direktori lavozimida faoliyat yuritib kelgan.
Otabek Bozorov Andijon viloyat adliya boshqarmasi boshlig‘i lavozimiga tayinlandi.
Bozorov 1981-yilda Namangan viloyati Pop tumanida tug‘ilgan, ma’lumoti oliy, 2003-yilda Farg‘ona davlat universiteti (kunduzgi)ni tamomlagan, mutaxassisligi huquqshunos. U mehnat faoliyatini 2003-yilda Namangan viloyat adliya boshqarmasining Xorijiy investitsiyalar va xorijiy investitsiyalar ishtirokidagi korxonalarni huquqiy himoya qilish bo‘limi katta maslahatchisi lavozimidan boshlab, vazirlik tizimida turli lavozimlarda ishlagan. Bozorov shu kunga qadar Davlat xizmatlari agentligi Andijon viloyati boshqarmasi boshlig‘i lavozimida faoliyat yuritib kelgan.
Nodir Jumanyozov Xorazm viloyat adliya boshqarmasi boshlig‘i lavozimiga tayinlandi.
Jumanyozov 1982-yilda Xorazm viloyati, Hazorasp tumanida tug‘ilgan, ma’lumoti oliy, 2003-yili Qoraqalpoq davlat universiteti (kunduzgi), 2005-yilda Toshkent davlat yuridik instituti (magistratura), 2013-yilda esa Janubiy Koreyaning Chung-Ang Sau universiteti (doktorantura)ni tamomlagan, mutaxassisligi huquqshunos.
U mehnat faoliyatini 2005-yilda vazirlikning Ma’muriy va ijtimoiy qonunchilik boshqarmasi katta maslahatchisi lavozimidan boshlab, vazirlik tizimida turli lavozimlarda ishlagan. Jumanyozov shu kunga qadar Davlat xizmatlari agentligi Xorazm viloyati boshqarmasi boshlig‘i lavozimida faoliyat yuritib kelgan.
Adham Turdiyev Toshkent shahar adliya boshqarmasi boshlig‘i lavozimiga tayinlandi.
Turdiyev 1983-yilda Toshkent shahrida tug‘ilgan, ma’lumoti oliy, 2004-yilda Toshkent davlat yuridik instituti, 2021-yilda Toshkent davlat yuridik universiteti magistratura bosqichini tamomlagan, mutaxassisligi huquqshunos. U adliya organlaridagi mehnat faoliyatini 2006-yilda Toshkent shahar adliya boshqarmasi 2-toifali ish yurituvchi kotibi lavozimidan boshlab, vazirlik tizimida turli lavozimlarda ishlagan.
Adham Turdiyev shu kunga qadar Adliya vazirligi O‘zbekiston prezidenti hujjatlari va topshiriqlari ijrosini nazorat qilish boshqarmasi boshlig‘i lavozimida faoliyat yuritib kelgan.
Abdumutalib Dadajonov Toshkent viloyat adliya boshqarmasi boshlig‘i lavozimiga tayinlandi.
Dadajonov 1980-yilda Farg‘ona viloyatida tug‘ilgan, ma’lumoti oliy, 2003-yilda Toshkent davlat yuridik institutini, 2008-yilda Toshkent davlat yuridik universiteti magistratura bosqichini tamomlagan, mutaxassisligi huquqshunos.
U mehnat faoliyatini 2001-yilda Asaka tuman prokurori yordamchisining ish o‘rganuvchisi, tuman prokurori yordamchisi, adliya organlaridagi mehnat faoliyatini 2005-yil Toshkent shahar adliya boshqarmasi devonxonasining 1-toifali ish yurituvchisi —kadrlar bo‘limi katta maslahatchisi, tadbirkorlar huquqlarini himoya qilish bo‘limi bosh maslahatchisi lavozimidan boshlagan, vazirlik tizimida turli lavozimlarda ishlagan. Dadajonov shu kunga qadar Andijon viloyat adliya boshqarmasi boshlig‘i lavozimida faoliyat yuritib kelgan.
Mavzuga doir: O‘zbekiston Adliya vaziriga yangi o‘rinbosar tayinlandi
Izoh (0)