Toshkentdagi bog‘chalardan birida o‘ttiz nafarga yaqin bola ovqatdan zaharlangani rad etildi

Ijtimoiy tarmoqlar orqali Mirobod tumanidagi bog‘chalardan birida o‘ttiz nafarga yaqin bola ovqatdan zaharlanib, davolanayotgani haqida lavha e’lon qilingan. Maktabgacha ta’lim vazirligi xabar yuzasidan munosabat bildirdi.

“Hozirgi kunga qadar, 2022-yil 30-aprel kuniga davlat maktabgacha ta’lim tashkilotlarida tarbiyalanuvchilar orasida hech qanday zaharlanish hamda kasallangan tarbiyalanuvchilar mavjud emasligini ma’lum qilamiz”, — deyiladi vazirlik xabarida.

Ma’lumot uchun, Mirobod tumani tasarrufida 50 ta maktabgacha ta’lim tashkiloti faoliyat yuritayotgan bo‘lib, shundan 27 tasi davlat 23 ta nodavlat maktabgacha ta’lim tashkilotlarini tashkil etadi. Tumanda faoliyat yuritayotgan davlat maktabgacha ta’limi tashkilotlariga qamrab olingan bolalar soni jami 8477 nafar, shundan 6627 nafari davlat maktabgacha ta’lim tashkilotlariga, 1850 nafari nodavlat maktabgacha ta’lim tashkilotlariga qamrab olingan.

Bundan avval Oqqo‘rg‘ondagi bog‘chada 25 nafar bolaning zaharlanish ishi bo‘yicha 6 nafar shaxsga ayblov e’lon qilingani haqida xabar berilgandi.