Novosibirskda voyaga yetmagan farzandi bilan qiyin ahvolda qolgan o‘zbekistonlik ayol vatanga qaytarildi

Rossiyaning Novosibirsk shahrida voyaga yetmagan farzandi bilan qiyin ahvolda qolgan ayol yordam ko‘rsatildi, deb xabar beradi O‘zbekiston Tashqi mehnat migratsiyasi agentligi.

Ma’lum qilinishicha, farzandi bilan yolg‘iz qolib ketgan fuqaro Sh.G. Tashqi mehnat migratsiyasi agentligining Novosibirsk shahridagi vakolatxonasi hamda O‘zbekiston bosh konsulxonasi hamkorligida 22-aprel kuni vatanga qaytarilgan.

Shuningdek, Sankt-Peterburg shahriga ishlash uchun borib, og‘ir yuk ko‘targani sabab sog‘ligi yomonlashgan fuqaro Q.Z.ning ham vatanga qaytishiga yordam ko‘rsatilgan. Erkakning so‘zlariga ko‘ra, u ish joyida og‘ir yuk ko‘targan va operatsiya bo‘lgani sabab ahvoli yomonlashgan, hatto yurishda ham muammoga duch kelgan. Shifokorlar unga o‘z vataniga qaytib, davolanishni maslahat bergan.

Bundan avval Sankt-Peterburg va Vladivostokda qiyin ahvolga tushib qolgan yosh bolali yana ikki ayol O‘zbekistonga qaytarilgandi.