Bahodir Jalolovning navbatdagi jangi sanasi va raqibi ma’lum bo‘ldi

Professional boksning og‘ir vazn toifasida (+90,7 kg) harakat qilib kelayotgan Bahodir Jalolov (10-0, 10 KO) Nyu-Yorkdagi jang kechasida ringga chiqadi.

Showtime tomonidan o‘tkaziladigan 10-iyun kungi oqshomda o‘zbekistonlik bokschiga belgiyalik Jek Mulovayi (11-2-1, 7 KO) raqiblik qiladi. 8 raundga mo‘ljallangan jang boks oqshomining markaziy jangi bo‘lishi kutilmoqda.

Jangga chiptalar 22-apreldan boshlab sotuvga chiqqan. Chiptalar narxi 39 dollardan boshlanadi.

Eslatib o‘tamiz, Jalolov so‘nggi marta 18 mart kuni Dubayda Kamil Sokolovskiga qarshi ringga chiqib, uni 5-raundda texnik nokaut evaziga mag‘lubiyatga uchratgandi. Ungacha esa dekabr oyida kolumbiyalik Xulio Sezar Kalimenoni birinchi raunddayoq nokaut bilan g‘alaba qozongandi. Shuningdek, 2021-yilning aprel oyida latviyalik Kristaps Zuitsni nokaut evaziga taslim etgan.

Jek Mulovayi so‘nggi jangini 16-aprel kuni gruziyalik Giorgi Tamazashviliga qarshi o‘tkazib, g‘alaba qozongan.