Namanganda “Zakovat” tanlovi g‘oliblari va’da qilingan sovg‘alar berilmagani uchun norozilik bildirdi (video)
Ijtimoiy tarmoqlarda Namangan viloyatining Yangiqo‘rg‘on tumanida “Zakovat” intellektual o‘yini g‘oliblariga va’da qilingan sovg‘alar berilmagani sabab ishtirokchilar norozilik bildirgani tasvirlangan video tarqaldi. Yoshlar ishlari agentligining viloyat boshqarmasi tomonidan holat bo‘yicha o‘rganish ishlari olib borildi.
Ta’kidlanishicha, “Zarbdor” mahallasida “Zakovat” tanlovi o‘tkazilgan va bosh sovringa 10 ta iPhone 13 Pro Max qo‘yilgan. Lekin uning o‘rniga “televizor olib turinglar, telefonlaringizni keyin olib kelib beramiz”, deyilgan. G‘oliblar esa televizorlarni olmagan va sahnada o‘z noroziligini bildirgan.
Yoshlar ishlari agentligining viloyat boshqarmasi esa holatni o‘rganib chiqib, hodisa qahramonlari bilan suhbatlashgan. Unga ko‘ra, “Zarbdor” mahallasi jamoasi vakillari “Zakovat” o‘yini g‘oliblari uchun beriladigan mukofotlar haqidagi Telegram’da tarqalgan norasmiy, feyk ma’lumotlarga ishonib qolganini ma’lum qilgan. Bu esa o‘z navbatida tushunmovchilikni keltirib chiqargan.
Avvalroq Namanganda fan olimpiadasida g‘olib bo‘lgan o‘quvchi unga berilgan noutbukni o‘qituvchilar tortib olgani, Nurobodda IT-tanlov g‘olibiga berilgan eski noutbuk mashmashasi ortidan tuman hokimi o‘rinbosari ishdan olingani to‘g‘risida xabar berilgandi.
Eslatib o‘tamiz, 2021-yil oktabr oyida davlat rahbari Buxoro viloyati Romitan tumanida “Zakovat” intellektual o‘yinining final bosqichiga tashrif buyurib, bahsni kuzatgan. Tadbir so‘ngida nutq so‘zlab, bilimdon yoshlarga sharoit yaratish uchun ko‘plab tashabbuslarni bildirgan edi. Intellektual turnirlar tashkil qilish, bilimdon yoshlarni rag‘batlantirish, yosh avlodning intellektual salohiyatini oshirishga qaratilgan kompyuter va mobil o‘yinlarni yaratgan dasturchilarga grant va subsidiyalar ajratish maqsadida 2022-yilda 50 milliard so‘m miqdorida, keyingi yillarda asoslangan hisob-kitoblarga muvofiq davlat budjetidan mablag‘ ajratilishi belgilangan.
