Bugun,

  • USD 11095.31
  • RUB 173.84
  • EUR 10772.44

Xalq deputatlari Andijon shahar kengashining 2021-yil 17-maydagi sessiyasida bir guruh deputatlar tintuvdan o‘tkazilgani, sessiyada Andijonda yer sotuvchilarning kirdikorlarini fosh qilgan deputat prokuror taqdimnomasiga ko‘ra, daxlsizlik huquqidan mahrum qilingani ma’lum qilingandi. “Daryo” muxbirining aniqlashtirishicha, daxlsizlik huquqidan mahrum bo‘lgan deputat 2021-yilning noyabr oyida 5 yil 2 oy muddatga ozodlikdan mahrum qilingan.

Jinoyat ishlari bo‘yicha Izboskan tuman sudining 2021-yil 3-noyabrdagi sud hukmida yozilishicha, deputat Shuhrat Karimov 2018-yilda Andijon shahar arxitektura va qurilish boshqarmasi arxitektori A.A. bilan oldindan jinoiy til biriktirib, shahar hokimining 2017-yil 15-iyuldagi qarori asosida Alliance Road Construction MCHJga ajratilgan 4 gektar yerda qurilish qilish uchun loyiha hujjatlarini tayyorlashga kirishgan. Va topografik chizmada boshqarma boshlig‘i imzosini qalbakilashtirib, yer maydonini 10,7 gektarga o‘zgartirgan.

Qayd etilishicha, sudlanuvchi jinoiy harakatlarini davom ettirib, o‘zi va sherigi A.A. bilan 2018-yilning 31-oktabrida tayyorlangan qalbaki arxitektura-rejalashtirish topshirig‘i to‘plamini 2020-yilning sentabr oyida qurilishga doir loyiha hujjatlarini ishlab chiqish uchun “Yevro Integral Stroy” MCHJga taqdim qilgan.

Sudlanuvchi jamiyatga berilgan 4 gektar yer maydonida ko‘p qavatli turar joy binolari, kottej qurilishi lozimligini bilsa-da, fuqarolar I.G., X.R., A.A., I.M., A.X., M.K., A.T., U.S., G‘.E. va O.K.larni aldab, mazkur yer maydoniga kelgusida ular tomonidan quriladigan uy-joyning kadastr hujjatlarini tayyorlatib berishini aytgan. Ularni ishontirish maqsadida jamiyat nomidan qurilish ishlarini amalga oshirishga ruxsat beruvchi mazmundagi ishonchnomalarni berib, ma’lum yer maydonlarini sotib yuborgan. Qo‘lga kiritilgan pullarni esa jamiyat hisob-raqamiga kirim qilmay shaxsiy ehtiyojlari uchun sarflagan.

Sud hukmi bilan Shuhrat Karimov Jinoyat kodeksining 168-moddasi (firibgarlik), 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) 243-moddasi (jinoiy faoliyatdan olingan daromadlarni legallashtirish) bilan aybdor deb topilib, unga nisbatan 1 yil 6 oy muddatga mansabdorlik va moddiy javobgarlik vazifalarida ishlash huquqidan mahrum qilingan holda 5 yil 2 oyga ozodlikdan mahrum qilish jazosi tayinlangan. Shuningdek, ashyoviy dalil deb e’tirof etilgan Lacetti rusumli avtomashina hamda Andijon shahridagi ikki qavatli bino davlat daromadi hisobiga o‘tkazilishi belgilangan.

Qo‘shimcha qilinishicha, jabrlanuvchilar Andijon viloyat sudiga apellyatsiya shikoyati yozib, sudlanuvchi sud hukmida ko‘rsatilgan jinoyatni sodir etmaganini aytib, oqlov hukmi chiqarishni so‘ragan. Andijon viloyat sudining Jinoyat ishlari bo‘yicha sudlov hay’ati tomonidan appelyatsiya tartibida ko‘rib chiqilgan ishda Jinoyat ishlari bo‘yicha Izboskan tuman sudining 2021-yil 3-noyabdagi hukmi o‘zgartirishsiz qoldirilgan.

Eslatib o‘tamiz, deputat daxlsizlik huquqidan mahrum qilingach, “Daryo” muxbiri vaziyatga oydinlik kiritish maqsadida jurnalistik surishtiruv o‘tkazgandi. Shuhrat Karimov “Daryo” muxbiriga bergan intervyusida deputat sifatida qonun va qonunosti hujjatlar ijrosini xalqqa yetkazish va ijrosini nazorat qilishga harakat qilgani, shu sababli bir qator tashkilotlarga tegishli tartibda deputatlik so‘rovlari yuborgani, bu esa mutasaddilarga yoqmaganini bildirgandi.

Andijon shahar hokimi Bahrom Haydarov esa deputat Shuhrat Karimov o‘ziga ajratilgan to‘rt gektar yer maydoni atrofidagi qo‘shimcha olti gektarni ham noqonuniy qo‘shib olgani, o‘ziga biriktirilgan yerdan ko‘p qavatli uylar, kottejlar, maishiy xizmat binolari qurishi kerak bo‘lgan bo‘lsa-da, belgilangan ishlar amalga oshirilmagani ta’kidlagan.

Oradan bir oy o‘tib, daxlsizlik huquqidan mahrum qilingan deputat Jinoyat ishlari bo‘yicha Izboskan tumani sudining 2021-yil 23-iyundagi ajrimiga muvofiq Jinoyat kodeksining 168-moddasi (firibgarlik) 3-qismi “b” bandi va boshqa moddalar bilan gumon qilinib, unga nisbatan qamoqqa olish ehtiyot chorasi qo‘llanilgani xabar qilingandi.

Izoh
Asosiy yangiliklar
Mahalliy
“Andijonda 127 ming nafar ishsiz fuqaro mavjud. Har yili yana 50 ming nafar yoshlar mehnat bozoriga kirib keladi” — prezident 
Mahalliy
O‘zbekistonda 2-fevraldan metan zapravkalar faoliyati tiklanadi
Mahalliy
Jizzax, Samarqand, Farg‘onada elektr tarmog‘iga noqonuniy ulanib, qariyb 250 mln so‘m zarar yetkazgan tadbirkorlar ushlandi