Ugandada 10-yanvar, dushanba kuni barcha maktablar 2020-yil mart oyidan beri birinchi marta qayta ochildi. Shu tariqa koronavirus pandemiyasi tufayli o‘quvchilar uchun dunyodagi eng uzoq davom etgan karantin nihoyasiga yetdi, deb yozmoqda Associated Press.
Nashrning yozishicha, Ugandadagi ta’lim muassasalari 83 haftadan ko‘proq vaqt davomida yopiq bo‘lgan. Bu davrda 10 millionga yaqin o‘quvchilar faqat bir marta – 2021-yilning fevral oyida maktablarga qaytgandi. Biroq iyun oyida bolalar yana majburiy ta’tilga chiqarildi, chunki o‘shanda mamlakatda COVID-19 rekord darajada o‘sgan.
Endi maktablar qancha vaqt ishlashi hozircha noma’lum — hozirda yana Ugandada koronavirus bilan kasallanganlar sonining ortishi qayd etilgan. 2022-yilning boshidan buyon mamlakatda kunlik kasallanishlar soni dekabr oyiga nisbatan 10 foizga oshgan.
Mamlakat prezidenti Yoveri Musevenining so‘zlariga ko‘ra, agar reanimatsiya bo‘limlarining yarmidan ko‘pi kasallangan bemorlar bilan to‘lsa, karantin qayta tiklanishi mumkin.
Bu orada Uganda Ta’lim vazirligi qisqartirilgan o‘quv dasturini tasdiqladi, unga ko‘ra, o‘quvchilar avtomatik tarzda keyingi sinfga o‘tkazildi.
Avvalroq Ispaniyada ochiq havoda dars o‘tishga mo‘ljallangan plyaj maktabi ochilgani, Portugaliyada ikki oylik qat’iy karantindan keyin maktablar qayta ochilgani haqida xabar berilgandi.
Izoh (0)