Yaponiya bosh vaziri rasmiy qarorgohiga ko‘chib o‘tdi. 10 yildan buyon bo‘sh turgan ushbu bino haqida turli mish-mishlar yuradi
Yaponiya bosh vaziri Fumio Kisida Tokio markazidagi hukumat binolari majmuasida joylashgan rasmiy qarorgohiga ko‘chishni yakunladi. Bu haqda bosh vazir kanselyariyasiga tayanib, “TASS” xabar berdi.
“Uzoq vaqtdan beri birinchi marta ko‘chishdan keyin o‘zimni tetik his qilyapman. Hukumat ishlariga e’tibor qaratish zarurligini hisobga olib, shunday qilish to‘g‘ri bo‘ladi, deb o‘yladim”, — dedi Kisida.
U bilan birga to‘ng‘ich o‘g‘li, bosh vazir kotibi bo‘lib ishlayotgan Syotaro ham qarorgohda yashaydi. Turmush o‘rtog‘ining ko‘chib o‘tishi haqida Kisida aniq javob bermadi va rafiqasi tez-tez Tokiodan ona shahriga borib turishini aytdi. Bosh vazirning ta’kidlashicha, u oilasi bilan aynan qancha vaqt o‘tkaza olishini bilmaydi.
Oktabr oyida bosh vazir etib tayinlanganidan beri Kisida Akasaka tumanidagi kanselyariyadan mashinada uch daqiqalik masofada joylashgan parlament yotoqxonasida yashashni davom ettirayotgandi. Turar joy, o‘z navbatida, bosh ofisga ulashgan bo‘lib, bu har qanday favqulodda vaziyatda, masalan, tabiiy ofatda amaldor uchun o‘z vazifasiga imkon qadar tezroq kirishish imkonini beradi.
Tokio markazidagi rasmiy qarorgohdan foydalangan so‘nggi bosh vazir Yosixiko Noda bo‘lgan. U 2011-yilning oktabr oyida qarorgohga ko‘chib o‘tgan. 2012-yilda uning o‘rnini egallagan Sindzo Abe esa qarorgohga ko‘chmasdan Tomigaya tumanidagi uyida rafiqasi va onasi bilan yashagan. Abe bu qarori uchun tez-tez tanqid ostiga olingan, chunki KXDR ballistik raketa uchirgandan keyin uning bosh hukumat idorasiga yetib borishi har doim ma’lum vaqt olardi. Favqulodda vaziyatlar yuzaga kelganda, bosh vazirni ish joyiga 15 daqiqa ichida, xususan mototsiklda yetkazish uchun hatto maxsus usul ishlab chiqilgandi.
“Xosiyatsiz” qarorgoh haqida
Yaponiya bosh vazirining rasmiy qarorgohi hozirgi ko‘rinishida 1929-yilda qurilgan. Binoning umumiy maydoni 7 ming kvadrat metrni tashkil qiladi, to‘rt qavatdan iborat, ulardan biri yer ostida joylashgan, bino arxitekturasida ar-deko va ekspressionizm uslublaridan foydalanilgan. 2003-yilda u qayta ta’mirlangan. Ichkarida xorijlik davlat rahbarlari va boshqa rasmiy shaxslar uchun yashash xonalari, ish xonasi, ovqatlanish xonasi va qabulxonalar mavjud.
Mazkur turar joy binosi haqida ko‘plab mish-mishlar va afsonalar yuradi. Ulardan ba’zilari arvohlar bilan bog‘liq. 1994-yilda bosh vazir bo‘lgan Sutomu Xataning rafiqasi o‘z kitobida uyda g‘alati muhit va sovuqlik his qilganini, shuningdek, hovuz yonida oq sharpa ko‘rganini yozgan. Yosiro Mori (2000—2001-yilda bosh vazir bo‘lgan), o‘z navbatida, tunda eshik tutqichlarining shiqirlashi haqida gapirgan. Undan keyingi bosh vazir Dzyunitiro Koidzumi Mori qarorgohdagi arvohlardan ehtiyot bo‘lishni maslahat bergan.
O‘zga dunyo kuchlari haqidagi mish-mishlarga qo‘shimcha ravishda, yaponiyalik siyosatchilar orasida rasmiy qarorgohga ko‘chib o‘tish muddatidan oldin iste’foga chiqishga sabab bo‘lishi haqida qarashlar mavjud. Tarixga nazar tashlansa, bu uyda yashaganlar nisbatan qisqa muddat – ikki yilga yaqin lavozimda qolgan. Yasuxiro Nakasone (1982—1987-yillar) va Dzyunitiro Koidzumi (2001—2006) bundan mustasno. Shu bilan birga, Koidzumidan keyin qarorgohda yashagan olti nafar bosh vazirlar, shu jumladan, Sindzo Abe (birinchi muddat — 2006-yildan 2007-yilgacha) bu lavozimni atigi bir yil egallab turgan.
2012-yilda qaytadan saylangan bosh vazir Abe ikkinchi bor qarorgohga ko‘chmagan, shaxsiy uyida yashashni tanlagan. Oxir-oqibat u hukumat tepasida uzluksiz qolish bo‘yicha rekord o‘rnatgan — 2800 kundan ortiq.
