Ijtimoiy tarmoqlarda Andijon davlat universitetining Tarix fakulteti binosining to‘rtinchi qavatidan homilador ayol tushib ketgani haqida xabarlar tarqaldi.
Universitet axborot xizmatining “Daryo”ga ma’lum qilishicha, 2021-yilning 4-dekabr kuni Andijon davlat universiteti Ijtimoiy-iqtisodiyot fakultetining Amaliy psixologiya yo‘nalishi 2-bosqich talabalarining ota-onalari uchun majlis o‘tkazilgan. Majlis universitetning Tarix fakulteti binosining 4-qavatida joylashgan kichik majlislar zalida bo‘lib o‘tgan. Unda ishtirok etgan talabalardan birining kelinoyisi yig‘ilishdan chiqib, telefonda yaqinlari bilan suhbatlashish davomida qurilish bo‘layotgan hududni anglatuvchi to‘siqlarga ahamiyat bermasdan zinapoyaga yurishi natijasida tushib ketgan.
Hodisa yuz bergan vaqtning o‘zidayoq universitetning mas’ul xodimlari tomonidan shoshilinch tez yordam chaqirilib, fuqaro respublika shoshilinch tez tibbiy yordam ilmiy markazi viloyat filialiga universitet ma’muriyati vakillari hamrohligida olib borilgan va birinchi yordam ko‘rsatilgan.
Ayni paytda baxtsiz hodisa yuzasidan prokuratura va ichki ishlar xodimlari tomonidan surishtiruv ishlari olib borilmoqda.
Qayd etilishicha, ayni paytda ushbu binoda kapital ta’mirlash ishlari olib borilayotgan bo‘lib, voqea sodir bo‘lgan zina tomondan chiqish yopilgan. To‘rtinchi qavatda xavfsizlikni ta’minlash, talabalarni qurilish bo‘layotganidan ogohlantirish uchun to‘siq sifatida stollar oralatgan holatda joylashtirilgan. Shunday bo‘lsa-da, fuqaro boshqa xayollar bilan to‘siqqa e’tibor qilmasligi natijasida baxtsiz hodisa sodir bo‘lgan.
Izoh: Ushbu xabar 4-dekabr kuni soat 17:30 da tahrirlandi. Xabarning dastlabki tahriri sarlavhasida 4-qavatdan tushib ketgan ayol homilador bo‘lgani yozilgandi. Keyinroq universitet axborot xizmati ayolning homilador bo‘lmaganini ma’lum qildi. “Daryo” tahririyati mazkur xato va tekshirilmagan axborot orqali yetkazilgan noqulayliklar uchun uzr so‘raydi.
Izoh (0)