Noyabr oyida O‘zbekistonda bog‘cha yoshidagi bolalar va 1-sinf o‘quvchilari grippga qarshi bepul emlash boshlangani to‘g‘risida xabar berilgandi. Sog‘liqni saqlash vazirligining ma’lum qilishicha, grippga qarshi vaksinatsiya jarayonlari keyingi yilning mart oyigacha davom etadi.
O‘zbekistonda maktabgacha ta’lim tashkilotlari tarbiyalanuvchilari hamda umumta’lim maktablarining 1-sinf o‘quvchilari grippga qarshi emlanmoqda. Shu maqsadda 2021-yilning avgust oyidan oktabr oyigacha 3 705 588 doza grippga qarshi vaksina olib kelingan.
Shuningdek, kasallanish holatlari ortishi sababli, hukumat tomonidan yurtimizga 2 million doza “Grippol plyus” vaksinasi keltirilgan. Rossiyada ishlab chiqarilgan ushbu preparatning samaradorligi xalqaro darajada e’tirof etilgan.
3-dekabr holatiga ko‘ra, mamlakat bo‘ylab tashkil etilgan emlash punktlarida 1 324 185 nafar MTT tarbiyalanuvchisi, 671 852 nafar 1-sinf o‘quvchisi grippga qarshi emlangan. Shunday qilib, jami 1 996 037 nafar bola grippga qarshi vaksina olgan.
“Biz oddiy kasallik deb hisoblagan gripp hayot uchun katta xavf tug‘dirishi, hatto og‘ir asoratlarga olib kelishi mumkinligini hisobga olib, yurtdoshlarimizni bu jarayonda yanada faol bo‘lishga chiqiramiz”, — deyiladi xabarda.
Eslatib o‘tamiz, O‘zbekistonda 20—30-sentabr kunlari 4-5 yoshli bolalar poliomiyelitga qarshi ommaviy vaksinatsiyadan o‘tkazilgan edi. O‘shanda bolalarni emlash uchun hududlarga 1,2 million doza inaktivlangan poliomiyelit vaksina yetkazib berilgandi.
Izoh (0)